Die gheestelicke melody

Dit is een sequency van Sinte Kathrijn seer scoen

[60r] Een suver maecht
My wel behaecht
End is mijns herts begheren.
Och of ic waer
Ter stont by haer
Tot Jhesus groter eeren,
So soud ic bly
Oec wesen vry
Van al dat my mach deren.

Sy is seer scoen
End draecht²⁸ een croen,
Die heeft haer God ghegeven.
Die hoechste throen,
Dat is haer loen,
Daer is sy seer verheven.
Sy [60v] heet Katrijn,
Hoer claer aenschijn
Verlicht dat ewich leven.

O Jhesu heer,
U grote eer
Ghescye tot allen tyden.
Ic bid macht sijn
Laet Sint Katrijn
My troesten in my liden.
End oec wanneer
Ic haer begheer,
Laet sy my dan verbliden.

Ghelieftet u,
So sel ic nu
Aen haer doen mijn ghebeden,
End prysen seer,
Want sy hier neer
Heeft vromelic ghestreden,
Tormenten veel
End die gheheel
Om uwen wil geleden.

O maecht Katrijn,
[61r] Claer, eel end fijn,
God gruet u scoen volcomen,
So menichfout
Als op dat wout
Staen rosen ende bloemen.
So wie u mynt
End gracy vijnt,
Hi mach hem wael vervromen.

U dienre tsijn
Is my gheen pijn.
Och mocht ic u aenscouwen,
Mit sueticheyt,
Oetmoedicheit,
Mit allen deuchden trouwen.
Ghelieftet Goy,
Ic naemt wel soy,
Twaer my een dinck van gouwen.

U suete naem
Heeft goede faem²⁹
Daer boven, oec beneden.
Men [61v] mynt u seer,
Men doet u eer
Tot menigherhande steden,
Indien dat gi
Hebt wel end vry,
Voert kerst gheloef ghestreden.

En hoerde nye
Dat vrou was ye
End maecht so van scrifturen,
Dat sy verwan
So menich man
Mit reden, mit scrifs figuren,
Als gi o bloem
Die nu draecht roem
Mit recht tot alre uren.

Ju oechkijns sijn
Nu claer end fijn
Sy Jhesum contempleren,
Goots lieve soen,
Heer van den throen,
Ju brugom, heer[62v] der heren.
O lief Katrijn,
U claer aenscijn
Te sien is mijn begheren.

Een zuet gheluyt,
O suver bruyt,
Gi hoert int ewich leven.
Hoert my doch nu,
Dat bid ic u,
End wilt my nijt begheven.
Oec maect dat soe
Dat ic van goe
By u mach sijn verheven

In hemmelrijc
Seer suetelic
Ju synnekijns opluken.
Ju smaec is suet,
Ju voelen guet,
In weelden is u ruken.
O lief Katrijn,
Ic bid macht sijn,
Laet my dies wat[63r]ghebruken.

So wie u dient,
Weest doch sijn vrient
O scoender creaturen.
So waer ic ga,
Sit, leg of sta,
Helpt my in alre uren,
Dat ic verwin
Mit Jhesus myn
Mijns vleyscelics naturen.

Gi sijt seer rijc
End gracelijc
Verlost van allen sorghen.
End ic heb noot,
Mijn scout is groot,
Ic bid wilt my verborghen,
Als ic sel gaen
Ter antwort staen
Tsy nu of corts of morghen.

O lief Katrijn,
U doot, u pijn
Laet comen my te baten.
[63v] Ic heb misdaen,
Mij seer ontgaen,
Besondicht boven maten.
Het is my leet,
Ic bin bereet
Mijn quade wil te laten.

O reyne maecht,
Gi my behaecht,
Laet my u doch behaghen
Mit ziel, mit lijf,
O suver wijf,
So mach ic vrolic draghen
Ju brugoms myn
End u daer in
Int hert tot allen daghen.

O eel end wijs,
Gi draecht nu prijs
Mit recht int ewich leven.
Groot lof end eer
Ons lieve heer
End u die borghers gheven.
Het gheeft[64r]wel reen
Want gi sijt een
Die wonder hebt bedreven.

O jonghe hert,
Wat groter smert
Gi leet doer Jhesus mynne.
Diet overdenct
End wael bekent,
Si³⁰ gaf u goet beghinne,
Mer beter eynd,
Al wast ellend,
O lieve troesterinne.

O suete troest,
Ic bid verloest
My, arme creature,
Van al dat my
Contrary sy,
Als coemt die laetste ure
Te gheven reden
Van al mijn seden,
Dat my sel werden zuere.

Ic my beveel
U scoen end eel,
O roes, o goedertieren.
[64v] Bidt God voer my
Dat ic word vry
Van allen quay manieren,
Een laet my sijn,
O lief Katrijn,
Van dien hi sel vercieren.

O coninghin,
Uut rechter myn,
So is dit mijn begheren.
Verblijt sijn gheest,
So wie dit leest
Of singt tot uwer eren.
End als hi leyt
Op sijn versceyt,
So wilt hem visiteren.

U sy lof, eer
Mit onsen heer
Nu end tot allen tiden,
Die ons hier neer
In hem wil seer
End oec in u verbliden,
End gheven loen,
Een suver croen
[65r] Na deser werrelts liden. Amen.

28 ‘draecht’ naar C; L: ‘draech’.

29 ‘faem’ naar C; L: ‘faemt’.

30 ‘Si’ naar C; L: ‘Hi’.