Die gheestelicke melody

[Des donredaechs: Hi troer die troeren wil]

Hi troer die troeren wil etc.

Want die ziel nu volcomelic ghetroest is van Marien, so keert sy [22r] haer van allen anxt ende vresen die haer soude moghen brenghen tot wanhoep. Ende sy gheeft haer tot hoep ende gheheel betrouwen in Jhesu Cristo, waerom sy waerachtelic ende mit recht goeden hoep ende goet betrouwen wel hebben mach in Jhesu Cristo. Dus wort sy nu ghetoghen van dat ander cordekijn hier voer ghenoemt dat hoep heet, ende sy spreect van groter blijsscap: ‘Hi troer die troeren wil, mijn troeren is ghedaen, etc.’ Als die propheet David seyt: Exquisivi dominum et exaudivit me et ex omnibus tribulationibus meis eripuit me.¹⁰ Dat is in Duytsch [22v]: ‘Ic heb den heer ghesocht ende hi heeft my ghehoert, ende uut al mijnre droefnissen heeft hi my verlost.’

Hi troer die troeren wil,
Mijn troeren is ghedaen.
Ic heb ghezweghen stil,
Mariam verstaen.

Waerom so soud ic troeren
Of sorghen alte seer?
Mi dunct ic bin vercoren
Van Jhesu minen heer.

Dat ic hem bin vercoren
Heeft hi ghedaen aenschijn,
Want ic most sijn verloren
Deed sijn doot end sijn pijn.

Hi is hier neer ghecomen
Daer in bin ic verblijt.
Misdaet sou my [23r] verdoemen,
Sijn doot heeft my ghequijt.

Hier om wil ic hem minnen
Die my dus heeft verlost,
End in mijn hertkijn¹¹ bijnden
Houwen voer al mijn troest.

Ic weet dat wel voerwaer,
Deed sijn pijn end sijn doot,
Al bay ic dusent jaer,
Twaer al verloren goet.

Dus wil ic my verbliden
Seer vroemelic in hym,
Draghen tot allen tyden
Sijn doot in minen syn.

Lof, eer, danck sy Marie,
Die edel suver maecht.
Ten was noch waerlic nye
Dat sy my liet versaecht.

10 Ps. 33 (geen letterlijk citaat).

11 ‘hertkin’ naar DH; L: ‘kertkijn’.