Die gheestelicke melody

Het eerste boek van Die gheestelicke melody

[1r] Hier beghint dat prologus van die gheestelicke melody tusschen Jhesum Cristum ende die mynnende ziel. Ende dese melody is ghemaect overmits als ons ydel ghedachten of temptacy te voren comen, dat wi ons dan sellen keren tot gheestelicker blijsscap ende lesen totter eeren Jhesu Cristi ende sijnre liever moeder Marien om die ydel ghedachten ende onvrede mede te verdriven.

Het is te hopen in Gode, als enighe van desen gheestelicken hymmekijns van ons ghelesen worden of ghedacht, dat wi dan wel een [1v] weynich verlicht sellen worden van des viants temptacien. Want hi nijt horen en mach dat men Jhesum Cristum noemt of Maria die suver maecht, of datmen hem beyden eer bewijst. Nu en is een ymmekijn hier nijt, Jhesus of Maria en is daer in ghenoemt. Oec mede so sijn sy alle tot hoerre beyder eeren ghemaect.

Ende want veel dinghen te samen zwaer sijn te verstaen ende verduysteren onse verstandenisse, so sijn dese ymmekijns ghescicket by ordinancie van daghe in die weecke, als aen elc ymmekijn bisonder gheteykent staet, om alle daghe wat sonderlings te nemen ende daer in te oefenen [2r] gheestelic, want elc bisonder alte veel smakelicker is alsmen die mynnentlicke woerdekijns wel overdencket.

Ende want zuete melody zeer antreckende is ende zeer suetelicke doet vollighen in dien dat onse heer Jhesus spreect: ‘Nyemant en coemt tot my dan die van minen hemelsche vader ghetoghen wert,’ aldus so wert hier gheruert van drie coerdekijns daer God almachtich die ziel mede trecket vander werrelts ydelheyt tot dat suete lant der ewigher glorien.

Dat eerste cordekijn dat is anxt ende is een beghin totter duecht.

Dat ander [2v] cordekijn dats hoep, een ghetrouwe arbeyt of oeffeninc in duechden.

Dat derde cordekijn is mynne, een volmaectheyt in duechden.

Mit dat eerste cordekijn anxt wert die ziel of die mensch ghetogen vanden sondighen leven totten gheestelicken leven. Want wye anxt heeft Gode te vertoernen ende voer die pijn der hellen, die scuwet die sonden ende dat weerlic leven ende hi keert hem totter duecht ende totten gheestelicken leven.

Ende uut oefeninghe der duecht of der goeder wercken coemt dat ander cordekijn hoep, daer die ziel mede wert ghetoghen van anxt [3r] ter hellen tot een betrouwen Jhesu Cristi of tot een seker verbeyden van toecomender salicheyt. Ende mit desen cordekijn dient die siel Jhesu Cristo ghetrouwelicken. Ende van ghetrouwen dienst Jhesu Cristi coemt dat derde cordekijn mynne.

Mit dit derde cordekijn myn wert die ziel ghetoghen van alle druck ende liden tot dat zuete lant der ewigher glorien. Ende dit is dat cordekijn daer die mynnende ziel begheert mede ghetoghen te werden, die dus spreecket in Canticis Canticorum: ‘Trecket my na di ende wi sullen lopen in die roecke van dynre welrukender salven.’

[3v] Dat eerste cordekijn anxt heeft vijf liedekijns of ymmekijns Int eerste, ‘Der werrelts myn is al verloren’,, beclaecht die ziel haer sonden ende des werrelts verdriet ende si begheret die werrelt te laten, dat haer zeer lastelic valt.

In dat ander ymmekijn, ‘O Jhesu here keert u tot my’, begheert si hulp van Jhesu Cristo. Ende hi troest haer zeer wel, also datsi die werlt begheeft. In dat derde ymmekijn, ‘Verblijt u lieve susterkijn’, troest die ziel wederom allen denghenen die Jhesu dienen ende die die werrelt hebben ghelaten. In dat vierde ymmekijn, ‘Ave Maria [4r] maghet reyn’, gruet die ziel die suver maecht Maria ende si begheert troest op die temptacien die haer te voren comen int gheestelicken leven dat sy aenghenomen heeft. Ende Maria gheeft haer raet wat si doen sel, wil si verlost sijn, ende die ziel antwert dat sy die raet volghen wil.

Int vijfste ymmekijn, ‘Maria coninghinne’, so dunct die ziel dat si Marien raet nijt wel volbrenghen en mach, also dat si begheert van Marien ghehulpen te wesen om haren raet te volbrenghen. Ende si wert ghetroest van Maria van allen droefheyt [4v] ende liden volcomelic, also dat si haer keert in dat seste hymmekijn van alle wanhope ende anxt tot goede hoep ende tot enen vollen betrouwen Jhesu Cristi Aldus is van dat ander cordekijn dat seste ymmekijn, ‘Hi troer die troere wil’.. Ende mit hope so coemt die ziel totter mynnen Gods. Aldus so is van dat derde cordekijn mynne dat sevende ymmeken, ‘O Jhesu uutvercoren heer’. Ende mitter mynnen coemt die ziel int lant der ewigher glorien, daer sy ewich blivet ende nymmermeer en verwandelt. Aldus so is dat achte ende dat leste ymmekijn, [5r] ‘O ghi die Jhesus wijnghert plant’, van dat suete lant der ewigher glorien. Ende die ziel troest daer alle die gheen die Jhesu dienen mitter onsprekelicker suverheit ende vruechde, die daer in dat suete lant ewelicke durende is, tot wellicken lant moet ons brengen Jhesus Cristus, Marien soen. Amen.