XC.
V Edle Koninginne wy eeren,
Vrouw van Hemel u lof wy meeren,
V loven en eeren met rechte,
Aller creaturen geslechte,
Een Moeder eewiger Majesteyt,
Daer toe u Godt heeft wel bereyt,
V omglantzet der Sonnen schijn,
Die Maen is onder die voeten dijn,
Op u reyn hooft is schoone,
Van twaelf Sternen een kroone,
Des eewige vaders dochter du bist,
Een Moeder sijns Soons Iesu Christ,
Des heylige Geests kuysche Bruyt,
V loven die Engel en alle luydt,
Seraphin u soetelijck singet,
Ave Maria Koninginne weerde,
Ghy vervreucht Hemel en eerde,
Ons allen is wel door uwen Soon,
Ghy sijt vol aller gnaden schoon,
Der Apostelen Vrouw en aller Christen,
Een ware Leering der Euangelisten,
V looft der Patriarchen schaer,
En die Propheten alle gaer,
Die Martelaers en Heyligen alle,
Loven u met grooten geschalle,
Ick meen u Ionckvrouw kuysch en reyn,
Wy eeren en loven u al gemeyn,
Veel gnaed verkrijgt ghy u dienaers fijn,
Oock die sondaers een Medecijn,
Die sielen verlost ghy wt der pijn
En deylt ons met die gaven dijn,
| |
Daerom o Vrouw bidden wy armen
Laet u onser oock erbarmen,
Verwerft ons vreuchd, gnaed en troost,
Dan ons u Soon heeft al verlost,
Dat wy hem weder mogen geven,
Lof en eer int eewigh leven,
En u oock loven in gloria,
O soete Ionckvrouw Maria. Amen.
|
|
Auteursrechtvrij