Geestelijcke harmonie

van veelderley ende uytghelesene soo oude als nieuwe Catholijcke Kerckelijcke Lofsanghen, Leysenen ende Liedekens, op die principaelste Feesten en getijden des Iaers, die men in’t Vorstendom Cleve by den Catechismus singht

LXXXIX. Een Geestelijck Liedeken van den Ave Maria.

Op de wijse: Alsoo ’t begint.

Ave der Maechden kroone,
Maria weest gegroet,
Klaer als de Sonne schoone.

[p. 125]

 

Ghy sijt vol graey soet,

 

Door u ons de deucht toevloet,

 

Want ghy hebt met diep ootmoet

 

Gebaert ons t’hoochste goet.      Door, &c.

 

Den Heer’ is met u reyne,

 

O vreucht des werelts wijt,

 

Och troostbare fonteyne

 

Ghy sijt ghebenedijt:

 

Want noyt mensch tot gheender tijt,

 

Was soo salich als ghy sijt,

 

Door u sijn wy bevrijt.      Want, &c.

 

Gedanckt, ghelooft, gepresen

 

Moet sijn den weerden pant,

 

V vrucht reyn uytgelesen,

 

Iesus u kindt playsant:

 

Die ons als een Leeu vaillant

 

Heeft ontdaen den helschen bant,

 

Door sijne machtighe hant.      Die ons, &c.

 

Maria hooch ghebooren

 

Wt Coningh Davidts saet,

 

Laet ons doch niet verloren,

 

Ghy sijt ons toeverlaet:

 

Siet wy sijn hier desolaet,

 

En vervult met allen quaet,

 

O ras komt ons te baet.      Siet, &c.

 

Lof Moeder der genaden

 

Sy u in’t aertsche dal:

 

Wee hem die u versmaden,

 

Fy Ketters valsch getal:

 

Wilt ons doch bevrijden al

 

Van der Ketters boos geschal,

 

En vanden helschen val.      Wilt, &c.