Flandrijs

(1998)–Anoniem Flandrijs– rechtenstatus


Fragment V
[Folio 9ra]
1785[regelnummer] Ende vraechdem om flandrise den here De rechte waerheit min no mere Seidem daer af adriaen Ende bin desen quam gegaen Uut hare camere aquiline 1790[regelnummer] Ende sach sitten metter slavine Haer broeder ende flandrijs niet Int herte quam haer sulc verdriet Dat soe in hare camere liep Jamerlike dat si riep 1795[regelnummer] Haer hande slaende soete lief Dit vernoi ende dit grief Bemoedde mi van eersten dage Dattic u nemmermeer en sage Aquiline de scone joncfrouwe 1800[regelnummer] Weende ende dreef groten rouwe Ende waende dat flandrijs doot ware In hare camere beswalt soe dare Wel iiii werven ofte v Doe quamen haer camer wiven 1805[regelnummer] Ghelopen doe si dat versagen Vrindelike si haers plaghen Tote dat si was becomen Aquilander hadde vernomen Dat sijn dochter deerde zaen 1810[regelnummer] Hi ende sijn sone adriaen Entie vrouwe gijngen tote haer Die si vonden in mesbaer Ende maecte jamerlijc geclach Ende doe soe die iii versach 1815[regelnummer] Stont si op ende liet haer clagen Om flandrise begonstese vragen Met enen suchte herde groot Adriaen telde haer al bloet De waerheit hoe flandrijs ontreet 1820[regelnummer] Van cuelne ende men ne weet Waer waert datti hem belende Ic bidde gode dattine sende Hare waert sprac de joncfrouwe Ende icne cortelike scouwe 1825[regelnummer] Van sinen live ongedeert Mine herte dor hem verseert Datti mach bliven onder de honde Versleigen adriaen verconde Aquilinen als hi eerst mochte
[Folio 9rb]
1830[regelnummer] Al de mort die flandrijs wrochte Te cuelne doe louch aquiline Daer na suchte soe stillekine Alstie van herten was ongesont Haer leven an flandrijs comen stont 1835[regelnummer] Soene sage houder gene zake Die van minnen sijn tongemake Hebben dicke soorge ende pine Also hadde aquiline Aquilander ende sijn zone 1840[regelnummer] Entie vrouwe ende alle die gone Die daer waren binder borghe Hadden om flandrise soorghe Hier leggic dese tale neider Ende keere te flandrise weder 1845[regelnummer] Die met ingelbeerte den zas Sine maent al duere was Tote dat quam de selve dach Daer de camp op te doene lach Buten castele optie heide 1850[regelnummer] Ende alstie dach met sire claerhede Quam daer men op vechten soude Halpmen flandrise den here boude Gereiden van hende toorde Al dat hem toe behoorde 1855[regelnummer] Sijn halsberch waert gemaliert Ende sijn helm die gefrutsiert Te voren was waert nu vermaect Van stale scone ende wel geraect Hine mochte andre wapine 1860[regelnummer] Dan de gene die waren sine Entie hi dicken hadde geprouft Dies was ingelbeert bedrueft Ende hadde hem gerne nieue gegeven Entoe flandrijs om sijn leiven 1865[regelnummer] Gewapent was heefti ontbeiten Van hem latic ende doe u weten Vanden hertoge seraphioene Die quam opten velde groene Daer men de camp soude doen 1870[regelnummer] Met hem cam sijn campioen Ende wel vc sire man Die alle hadden alsberge an Si camen voer ten crite gevaren Om dat si ane leggers waren
[Folio 9va]
1875[regelnummer] Optie joncfrouwe vander moort Seraphioen hadde wel gehoort Van flandrise de ridder milde Ende vanden swerde ende vanden scilde Ende vanden diere datti brochte 1880[regelnummer] Ende vanden wondere datti wrochte Te cuelne op aligorante Dies swoer hi diere bi tervogante Dat hi metten sinen sal vaen Den kerstijn ridder ende verslaen 1885[regelnummer] Of senden te cuelne binder stat Harde diere swoere hi dat Shertogen kempe hilt int parc In sassen en was geen so starc No so stout in al sijn doen 1890[regelnummer] Sine name was lentroen Groot was hi ende ongemicke Van wapinen was hi herde dicke Enen scilt voerdi van goude Met enen serpente de kempe boude 1895[regelnummer] Sat op een staerc destrier Hi sceen wel wesen ongehier Ende van haerde groter macht I staerken verstalden scacht Die ghevenijnt was ant hende 1900[regelnummer] Voerde de felle ombekende Daer hi mede sal doen gemoet I helm bruun stalijn goet Hadde op sijn hooft de sas lettroen Een swert i haex ende i fanchoen 1905[regelnummer] Hadde an hem de sarrasijn God moete in flandrijs hulpe sijn Jegen den fellen zas lentroene Het torende sere seraphioene Dat ingelbeert met sinen campe 1910[regelnummer] Niet ne spoet hi macht te rampe Tellen blijfti aldus achter Ic salne doden ende sire dachter Der morderigge bernen doen Sprac dhertoghe seraphioen 1915[regelnummer] Ende sijn goet trecken te mire hant Bin desen quam toe i seriant Tote ingelbeerte inde zale Ende seide here nu doet wale
[Folio 9vb]
Het es vele meer dan tijt 1920[regelnummer] Ende brijnget uwen kempe int crijt Want de hertoge seraphioen Heeft brocht sinen kampioen Ende wel vc sire man Die alle hebben alsberge an 1925[regelnummer] Ende sijn gewapent om haer lijf Maecti des camps langer blijf Si sullen werden vererret sere Nu spoet u ic raet u wel here Ingelbert sprac here kerstijn 1930[regelnummer] Nu es comen de viant mijn Met sinen kempe in dat crijt Laet ons varen hets tijt Ende doen datter toe bestaet Flandrijs hadde een stout gelaet 1935[regelnummer] Ende seide here ter goeder uren Met ere vaster couferture Brochte men geleit flandrijs part Int gereide spranc hi ter vaert Ende nam inde hant dat spere 1940[regelnummer] Dat scerp was ende sterc ter were Hi beedde achter sinen wert Doe dede wapenen ingelbert CC man in sijn casteel Of hem seraphioen achterdeel 1945[regelnummer] Wilde doen dat sijt gereet Wreken souden ende hi heet Datsi binden castele bleven Ende flandrijs die daer hilt beneiven Deide sinen cnape den centauroen 1950[regelnummer] Alrande wapenen an doen Ende deiden bliven inde steide Metten anderen dat hi dede Haerde node haddijs raet Want tachter bliven dochtem quaet 1955[regelnummer] Maer om dat hem sijn here hiet Ne dorste hijt ontseggen niet Ende bleef metten iic riddaren Ende flandrijs es wech gevaren Met ingelberte ende met hem achten 1960[regelnummer] Daer de andere na hem wachten Doe hilden si stille an beden ziden 1962[regelnummer] Ingelbeert sprac ten selven tiden

Fragment V