Flandrijs

(1998)–Anoniem Flandrijs– rechtenstatus


Fragment IV
[Folio 10ra]
1609[regelnummer] Van sinen broeder optie joncfrouwe 1610[regelnummer] Die dies heeft so groten rouwe Dat soe daer of sterven waent Die hertoge sent ende maent Ingelbeerte boden ende brieve Dattine bringen sal in grieve 1615[regelnummer] Ende alle die them behoren Dat heeft dertoge diere gesworen Ende dat hi sijn lant af winnen soude Ende ingelbeert omboot hem houde Als dies srechts wille pleigen 1620[regelnummer] Datti sal brijngen enen deigen Tenen campe daer hi begeert Ende eest dat der ingelbeert Sinen campe tonder ziet Soe doeti dat dhertoge gebiet 1625[regelnummer] Bede van goede ende van live Eest dattie kempe tonder blive Die de hertoge met hem bringet Soe eest recht datmen verdijnget Die joncfrouwe van der moert 1630[regelnummer] Die men haer tiet dus sal voort Gaen wat die hertoge begheert Bin deiser maent moet ingelbeert Vinden enen campioen Daer ns gheen so stout baroen 1635[regelnummer] Bin sinen lande die dar vechten Ende sine joncfrouwe daer verrechten Dies mijn here es sere te wets Want hi ducht te blivene int lets Ende sent weider ende voert 1640[regelnummer] Sine boden telker poort Omme hulpe sinen camp te vuldoene Ende ic bem i sire garsoene Die met haesten loepen moet Nu sidi alder zaken vroet 1645[regelnummer] Flandrijs andworde ende seide secht Hevet u joncfrouwe recht Ende es soe onsculdich vander daet Bi mamette daert al an staet Sprac die cnape ja soe here 1650[regelnummer] Soe es comen in desen zere Onverdient ende sonder scult Flandrijs sprac knape ghi sult
[Folio 10rb]
Ons wisen toten castele Ic wille over de damoisele 1655[regelnummer] Den camp houden ende tghevecht Wildi here sprac de knecht Sone wasic noit so blide Wi sulre comen in corter tide Nu laet ons porren op dese woort 1660[regelnummer] Die cnape daer ghi of hebt gehoert Liep met flandrise tes si quamen Ten castele alle iii te samen Die scone was ende sere voorbare De lieden worden sere in vare 1665[regelnummer] Alsi dat wilde dier versagen Ende flandrijs si onder vragen Deen den anderen wat dat si De cnape maecte groot gecri Ende seide het ware een stout baroen 1670[regelnummer] Die wilde weisen campioen Haers heren ende sire dochter verrechten Ridders vrauwen ende knechten Woordens uter maten blide Flandrijs besagen si te stride 1675[regelnummer] Daer veile was te merkene an Den scilt die hadde dedele man Ende swert was daer sere besien Maer den centauroen si ontsien Om dat hi hadde so vreimde vorme 1680[regelnummer] Altoes stont sijn haer te storme Enten scicht haddi ter vloge Altoes geset inden boge Flandrijs beete voorde sale V cnapen oft meer weet wale 1685[regelnummer] Dienden hem al daer van loven Ingelbeert quam doen van boven Uter zalen gelopen sere Als hi wiste dattie here Flandrijs wilde weisen sijn campioen 1690[regelnummer] Hi ontfijnc wel den stouten baroen Ende leedene met hem ter sale voort Ingelbeert sprac menich woort Vul hovessceiden ten riddere goet Int onthalen doe hi verstoet 1695[regelnummer] Dattie ridder was kerstijn Vraechdi omde name sijn
[Folio 10va]
Ende wane hi was ende sijn geslechte Entoe Flandrijs dies berechte Ingelbeerte was hijs vroe 1700[regelnummer] Ende seide mocht noch comen so Dat flandrijs den camp verwint Ende dat quite wert sijn kint Vander mordaet diemen hem tiet Hi es die ewelike beliet 1705[regelnummer] Tote sire doot ant kerstenheide Flandrijs verhuechde als hi dit seide Ende seide hi hopets te vulcomene Ingelbeert bat hem te nomene Wane hem de beeste quam 1710[regelnummer] Ende flandrijs de here lofsam Teldem al sine aventuere Men deidem af sine achemure Flandrise entie here brochte Enen mantel wel gewrochte 1715[regelnummer] Van goud draden ende fijn van ziden Ende hinken om flandrijs tien tiden Dies hem dancte menichfout Sine wapene deidemen int behout Ende sijn ors was geleet opt stal 1720[regelnummer] Het hadde dies hem behouvede al Ingelbeert eeft wel ontfaen Flandrijs ende groete ere gedaen Ende deiden sitten bi sire zide Noit sachmen man so zere blide 1725[regelnummer] Als hi was van enen gast Die sagittare hilt hem vast Omtrent flandrijs dat coene diet Dat hem wilde scaden niet Dies deidie als getrouwe garsoen 1730[regelnummer] Ter sale quam menich baroen Flandrijs tombevaene ende besiene Elc pijndem te hulden te diene Si mercten sine scone gedane Daer veile was te prisene ane 1735[regelnummer] Ende sine wel gewrochte leiden Die vrouwen onderlijngen zeden Ay mamet ende apolijn Waer waert noit vonden i heidijn Gelike desen kersten vulmaect 1740[regelnummer] Van scoenheiden of hi naect
[Folio 10vb]
In een bedde ware gheleigen Ende hi onser minne woude plegen So mochten wijs ons wel beromen Bin desen es inde sale comen 1745[regelnummer] Ingelbeerts dochter de scone aleit Haer was vanden riddere geseit Die kerstijn was ende wilde verrechten Haren noot enen camp vechten Jegen die haer leit op den moert 1750[regelnummer] Ende alse aleit dit heeft verhoort Was soe uter maten vro Want soe hadde geweent also In een camere daer si lach Datment in haer anscijn sach 1755[regelnummer] Van rouwe ende van anxten mede Maer alsmen haer de waerheit seide Van flandrise es soe comen Daer soe haer vader hadde vernomen Ende flandrijs sittene te gader 1760[regelnummer] Die joncfrouwe groette haer vader Ende daer na den here flandrise Ende seide ridder goet van prise Sidi die ons troesten sal Ende beiteren dat ongeval 1765[regelnummer] Datmen mi tiet sonder recht Jaic joncfrouwe nu ende echt Sprac de ridder wel gedaen Willic tonrechte weder staen Waer dat ic vinde dat mens doet 1770[regelnummer] De scone viel te sinen voet Ende seide here hebt danc ende lof Al dat in mijns vader hof Steet u te dienste sijt here of cnecht Ende al onse goet hets ooc recht 1775[regelnummer] Flandrijs hief op de scone aleide Vrindelike hi te hare seide Scone ic ne bems niet waert Dat ghi so omoedelike vaert Jegen mi ic bem i bloet riddare 1780[regelnummer] Die achter lande haren tare Dolen moet bi ongevalle Ic ne mochte [....] getale Seggen den noot die mi deert 1784[regelnummer] Doe sprac de here ingelbeert

Vorige Volgende

Fragment IV