Der fielen, rabauwen, oft der schalcken vocabulaer

Vanden Platschiereren.

¶ DAt .xxviij. capittel is vanden Platschiereren. Dese zijn blinden die voor die kercken op eenen stoel staen, ende spelen op der luyten, ende singhen menigherley sanck van verren landen daer si noyt geweest en hebben. Ende als sy dan wt gesongen hebben soo beginnen sy te Voppen ende te ferben, oft te lieghen, hoe dat sy blint gheworden zijn. Item als die henckers ende ander roffiaens haer naect wt trecken, ende als si haer seluen slaen met roeden om hare sonden wille, dat heeten si dan oock platschiereren met alsulcker vopperie. Item oock die op stoelen staen, ende die haer met steenen oft met andere dingen slaen, ende die van alsulcke heylighen segghen, die worden ghemeynlijck henckers oft schenders, ende boeuen oft roffiaenen.

Daer zijn noch menigerley bedeleers ende schalcken, die de lieden bedrieghen met menigerhande wonden gelijc bidsteren, die bidden gaen datmen haer kint heffen soude tot dat kersdom, ende segghen dat haer vrouwe in swaren arbeyt leyt, ende dese begheeren eenen

[fol. C6v]

penninc om gods wille, om dat si haer vrouwe helpen souden. Als dese onbekent zijn soo sijnt gemeynlijck boeuen, want sy gaen des eens daechs den eenen bidden, ende des anderen daechs den anderen, ende sy leeren in een stadt alle die rijcke lieden kennen, ende si liegen valschelijc, want si en hebben wijf noch kint.

Daer zijn noch andere schalcken, ghelijck nieutijders oft valsche boden, die eenen brief wt valsche landen conterfeyten, gelijc oft alsulcke brieuen van hare landen, oft van hare vrienden quamen, ende daer stellen si inne dat sy die boden dit oft dat geuen souden. Maer ick rade v dat ghy wel besiet wien dat ghy wat gheeft.

Item sommighe brengen sommige lieden tijdinge, dat haer man oft haer vrouwe noch leeft die lange tijt wt den lande geweest heeft, ende maken dicwils onder die lieden die verhout zijn groote vreese ende werringe, ende alder meest zijn si van andere lieden om gelts wille daer toe gemaect gelijc ander erfgenamen, daer een af wt den lande is. Die sommighe brenghen oock aen die steden ende aen die Heeren groote leughenen voor nieuwe tijdingen, om dat sy daer af eenen drinckpenninck ghecrijghen souden.