Der fielen, rabauwen, oft der schalcken vocabulaer

Vanden Dutsbetteren, oft Dutsbetterinnen.

DAt .xv. capittel is vanden Dutsbetteren. Dese zijn bedeleers die haer in allen landen, om ende om voor die kercken leggen, ende spreyen eenen lijnen doeck ouer haer, ende setten was ende eyeren voor haer, gelijck oft sy kinderbedts vrouwen waren. Ende sy spreken dat haer af gegaen is, een doot kint in .xiiij. daghen nochtans en hebben sy som in .x. oft .xx. iaren geen kint gemaect. Ende dese worden genaemt dutsbetteren. Dese en sult ghy geen gelooue gheuen. Item het lach eens eenen man te Straesborch onder een lijnen slapelaken voor die groote kercke, ende dese gaf wt dat hi een kinderbedts vrouwe was. Ende dese worde ten lesten vander stadt weghen op gheheuen ende geuangen, ende in dat hals yser gestelt. Ende daer na worde hem dat lant verboden.

Daer zijn oock sommighe vrouwen, die wt gheuende zijn, hoe dat si een selsaem ende vreemde figuere gedragen hebben, ende op die

[fol. C3r]

werelt gebaert hebben. Als cortelijck int iaer ons Heeren .M.ccccc. ende .ix. gheschiede tot Pfortsheym daer een vrouwe quam, welcke vrouwe seggende was, hoe dat si in eenen corten tijt op die werelt gebaert hadde een kint ende een leuende padde. Ende dat si dese selfde padde gedragen hadde, tot onser lieuer vrouwen te Eensedel, ende dat si daer noch leuendich ware. Ende datmen dese padde alledage geuen moest een pont vleesch, ende datmense daer hiel voor een groot wonder, ende si bedelde oft badt ghielende, hoe dat si op den wech na onser vrouwen te Aiche was. Ende dese hadde ooc segel ende brief, die si op den predicstoel liet vercondigen. Dese selue vrouwe hadde in die voorstadt eenen stercken boeue sittende, die op haer wachtende was, ende dese hadden haer langhen tijt geneert met dese boeuerie. Ende en hadden si niet gewaerschout geweest, men soudese beyde gegrepen hebben, want het was al boeuerije daer si mede omghinghen.