Vander hoger vloet
Den vijfsten dach van Nouembre. Anno.xvc.xxx.wast weer maten groten storm van winde, ende het was des donredaechs eenen stercken storm, des vrydaechs ooc, ende des saterdaechs wast metter vloet volle mane, ende doen was den storm veel meerder dan hi te voren gheweest hadde, ende keerde hem wten westen int noorde, so dattet water wter zee hem vp hief bouen alle dijcken vanden lande van Vlaendren aen eenen cant, ooc van Middelborch in Zeelandt, van Ziericzee, van Rommerswale totten eynde vander schelde, so dat alle dijcken vander zee tot Antwerpen, ende voordere ouerliepen, ende den dijck van Vlaendren bi Antwerpen brack ten drye plaetsen in, so datter vele beesten verdroncken dye in die weyde waren. Dese vloet was aen den cant vander zee hooghe een Homborghen conne bouen alle dijcken. Ende desen vloet was eenen grooten voet hooghere dan men oeyt van eeneger vloet ghehoort hadde, welcken vloet veel schaden dede in Vlaendren, Zeelant ende Hollant, want daer vele schone dorpen verdroncken, ende menich mensche, men sach die huysen, menschen, beesten drijuen lancx den watere, welck seer deerlic om sien was. Incarnacioen.
Vijf Nouember noeyt dier ghelijcke
ghinck dwater ouer alle dijcke.
Auteursrechtvrij