Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Die antwoorde der Keyserijcker maiesteyt.

Ick en ghelooue niet wiste dye Coninck van Inghelandt die rechte waerheyt, hoe dat ick my ghesubmittert hebbe om eenen paeys te hebbene, hi en soude dit niet scriuen. Ende van die gheuanckenisse vanden paus, dat en es noyt met mijn consent gheweest, ende ooc es hi weder ghestelt in sijnen state.

¶ Aengaende vanden kinderen van Vranckerijcke. Als hi mi doet dat hi mi sculdich es sal icse hem leueren, ten heeft noeyt aen mi ghebroken dat si nyet vry en sijn, ende dat wi paeys souden hebben ghehadt. Maer dat v meester mi ontbiet dat hijse my met foortsen sal doen leueren. Ick hope byder gracien gods ende met behulp mijnder ondersaten dat ickse so bewaren sal datse my met gheender foortsen ghenomen sullen worden, want ick en ben nyet ghewoone in mijnen dinghen ghefoortseert te sijne. Ende die schult en heb ick hem noeyt gheloochent, ende ic ben bereet om hem te betalen so ick schuldich ben, ende ick heb sijnen Ambassaden daer af brieuen ghegheuen ende doen gheuen. Daer omme en can ick niet gheloouen dat hi daer om vp my orloghe aennemen wil, maer wilt hi vp mi orloghen, dat sal mi leedt sijn ende sal mi daer teghen moeten verweeren. Ende noch meer ander dinghen beual die keyserlijcke maiesteyt den Herault sijnen meester te seggen, dat die Herault beloefde te doen. Ende hy dede dye antwoorden maken in scriptis tot beyde den coninghen, dat hier te lanc waer te verhalen.