Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. i.r]

¶ Vanden alder victorieusten, ende onuerwinlijcsten Prinche Karolus, Keyser van Roomen, Coninck van Spaengien, ende van beyde die Cecilien, van Aragon, van Nauarre, van Napels. Hertoghe van Brabant, gheboren Graue van Vlaendren, Ende van sommeghe gesten, by sijnen tijden gheschiet, die seer wonderlijc sijn om hooren, ende oock ghenoechlijck om lesen.

IMP. CAESAR CAROLVS.V.

HISPANIARVM REX.

[fol. i.v]

Vanden alder victoriueste Keyser Karolus van Roomen, coninc van Spaengien.

etc. Eerfachtighe Graue van Vlaendren, binnen der stadt van Ghendt gheboren, hoe hy in allen den hooftsteden van Vlaendren, seer triumphelijc ghehult wordt. Ende in allen sinen landen, als Brabant, Hollant Zeelant.etc.eerlijcken ontfanghen was.

¶ Dat eerste Capittel.

[Opten.xxiiij.dach van Februarius, int Iaer van.xv^c en Anno.xv^c.ende.xv]

KArolus is dye.xxxiiij.Graue van Vlaendren, ende Conincx Philips van Castilien ende vrou Iannen van Spaengien oudtste sone. Ende was gheboren in die machtighe stadt van Ghendt, opten.xxiiij.dach van Februarius, int Iaer van.xv^c. welck iaer was een scrickel iaer. Op welcken dach nae die rekeninghe der tijden, hadde die onuerwinlijcke prince Kaerle, die groote ende gloriose victorie voor dye stadt van Pauien, daer die Coninc van Vrancrijck gheuanghen wert met veel eedelen, ende veel eedelen ooc doen verslaghen worden met menich.M.mannen. Op desen seluen dach van.xxiiij.in Februario, werdt dye moghende Prince Kaerle glorioselic met groter triumphen ook Keyser ghecroont. Wten welcken men wel mach mercken, dat god door sijn gracie wonderlijcke dinghen laet ende wil laten gheschien door desen onuerwinlijcken prince Karolo, dye welcke int iaer.M.CCCCC.ende.xv.ghehult wert voor een erfheere, ende eerlijck ontfanghen in alle die hooftsteden van Vlaendren, met seer schoonder triumphe ende eere.ende oock in Brabant, ende in allen sijnen landen, ende in die hooftsteden der landen, die hem eerlijcken besconcken voor sinen willecome Wesende Prince van Castilien, van Leon, van Granade, van Arragon, van Nauarre, van beyde den Cecilien, van Iherusalem, van Valence, van Maiorcke, van Sardinien, van Corsice.etc. Eertshertoghe van Oostenrijc, Hertoghe van Bourgondien, van Lothrijc, van Brabant, van Stiere, van Crayn, van Carniole, van Lymborch, van Lutzenborch, ende van Ghelder. Graue van Vlaendren, van Habsburch, van Tyrol, van Artoys, van Bourgondien, Palsgraue van Henegouwen, ende Lantgraue van Elsaten, Prince van Zwauen, Marcgraue van Bourgau, ende des heylichs rijcx, van Hollant, van Zeelant, van Phiret, van Kiburch, van Namen, ende van Zutphen, Heere van Vrieslant, van die Windesmarc, van Portenaw, van Salines, van Mechelen.

¶ In dien tijden als dese prinche Karel in Brabant ende in Vlaendren ghehult was, so was hi vertrocken in Hollant, ende so quamen in Brabant grote Ambassaden, als die Graue van Vendonne, ende die Bisschop van Parijs met vele eedele mannen om den Prince te sprekene, dien si volchden in Hollant daer si den prince ter spraken quamen, daer een huwelijc ghesloten wert tusschen den Prinche van Castilien ende des conincx Lodewijcx ionghe dochter, welc huwelijc seer grotelic verpeynt was

¶ Item bi raden vanden Keyser Maximiliaen was ghemaect een huwelijc tusschen den coninc van Dennemarcke ende ons princen suster Iohanne. So was ooc op die selue tijt in Holland commen met groten machtigen schepen die Bisschop van Dronten met veel eedel mannen ende met groten state, van weghen des conincx van Dennemercke, van Noorweghen, van zweeden, van Vennen, ende van Godtlant, om des princen suster ouer te halen met eeren, om te sijn die coninginne van Dennemercken, also dat ghesloten was.

[fol. ij.r]

¶ Anno.xv^c.ende.xv.des Saterdaechs naer lichtmisse doen quam die hertoghe Karel Tantwerpen in, ende wert daer seer costelic ontfanghen bouen alle ander steden van Brabant. Des anderdaechs des sondaechs doen quam hi ter kercken met schoonen state, ende hy wert ghehult, ende ontfinc voort alle het landt.

[Op sinte Marien magdalenen dach]

¶ Op sinte Marien magdalenen dach doen trocken die drie cameren van Antwerpen te Mechelen, ende die vyolier was seer properlic toe ghemaect, ende hadden.vi^c.mannen onder te peerde, te waghene, ende te voet, al van eenderhande cleedinghe ende hoeyen, ende si hadden dat schoonste incomen.