Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item int Iaer.xvc.ende achte heeftmen strenghelic ghenouchten int land van Ghelre]

Item int Iaer.xvc.ende achte heeftmen strenghelic ghenouchten int land van Ghelre, ende die Prinche van Anholt die van Maximilianus ghesonden was, omme generael capiteyn te sijne, heeft tslot van Pourroyen afgheworpen ende te niete ghedaen.

¶ Item ouermits dat grote orloghe was in Kerstenrijcke, want dye Venechianen orloghe hadden yeghens den Paeus, ende die keyser ende die coninck van Vranckerijcke tsamen gheaccoordeert waren metten Paeuse yeghens die voorseyde Venecianen, ende andere princhen, midts desen grooten twiste in lijden waren. So es eenen generalen paeys ghemaect te Camerijck, daer af incarnacioen begrepen es in tnae volghende versikele.

[fol. CC.xcix.r]

Pacis perpetue conceptio stat Cameraci

Maer was tselue eenen gheuoederden peys want hi niet lange en duerde.

ITem naer tslot vanden voorgaenden paeyse, es die keyser Maximilianus huyt duytschlant herwaert ghecommen sijnde, ghereyst naer die stadt van Gendt, ende heeft al daer ghepresenteert den Eertshertoghe. Ende was daer gheconcludeert dat die Keyser ende die coninck van Vranckerijcke die doen ghealieert waren tsamen, oorloghen souden vp dye Venecianen. Ende heeft die Keyser achteruolgende dien ghesonden ouer tgheberchte als vpper Capiteyn mijn heere de Reulx, ende den bastaert van Bourbon dye des selfs lieutenant was, ende hebben hem vromelic ghehadt, want Padoua in handen vanden Keyser ghecommen es, met andere steden als Veroenen etc.

¶ Item int iaer.xv.^c.ende.xij.es vp ghestaen een oorloghe tusschen den coninck van Inghelant ende van Vranckerijcke, ende was groot ghereetschape ghemaect in Vlaendren ten bystande vanden Inghelschen, want si al tharnasch vp cochten hoe out dat was omme te besighen, so wel tschepe als te lande, ooc creghen si veel volcx van desen lande midts der.influencien vanden angelotten met hem, Ende werden als doen ghemaect te Mechelen groote artellerien, ende onder dander.xij.schone metalen bussen, diemen baptiseerde metten.xij.apostelen namen, ende die voorseyde coninck van Inghelant hadde doen maken bi meester Hans poppen ruytere, dye

een constenaer es van Vulcanus wercken, ende hoe wel si den tijtel droughen vanden xij.apostelen, gauen nochtans ander gheluyt dan dye deden, si souden beter ghedraghen hebben ander.xij.namen, als den naem van Nero, Phalaris, Diomedes, Mezencius Dionysius, Busiris, Commodus, ende dier ghelijc tyrannen namen, ende en behoordemen die heleghe namen met alsulcken tormenten ende duuelschen wercken niet te benamen.