Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Hoe die edel coninc Phelips, aflijuich geworden es in Spaengien, in die stadt van Bourges, van eender heeter cortsen, den.xxv.sten dach van September.xvc.vi.god hebbe die siele Amen.

[fol. CC.xcviij.r]

ITem ten seluen tijde sachmen een Comete, ende sijn corts daer naer seer drouue nyeu maren ghecommen huyt Spaengien, in Vlaendren, ende in alle dese nederlanden midts der doot vanden voorseyde coninc Phelips, die vpten.xxv.sten dach van September xv^c.iaer ende.vi.in die stadt van Bourges van eender heeter cortse (somen seyde) ghestoruen es, daermen grote droefheyt omme hadde, ende sijn nyet alleene dye edele van desen lande, maer ooc van Spaengien ende alle kerstenheyt grotelic bedroeft gheweest, ende mestroostich gheworden. En corts daer na midts ghebreke sijn dye edele huyt desen lande, ende die duytsche knechten weder ghecommen naer Vlaendren, die sommege tscepe maer den meestendeel vanden knechten quamen te voete duer Vranckerijcke. Mijn here van Nassauwen, ende mijn here van Beueren ende mijn here van Ysselsteyn quamen tscepe, ende warender ooc sommeghe die quamen duer Inghelant, ende andere duer Sauoyen

¶ Item die coninghinne bedreef grooten rauwe ende mesbaer, ende hadde onsprelijcke droefheyt, want si ooc begort was met een vruchte, die welcke na dat si daer af verlost was gheheeten was Katharina.

¶ Item corts daer naer vergaderden die staten vanden lande te Louen, ende na vele communicatien die de staten hadden, so hadden si in Ambassaden ghesonden aen den Keyser Maximilianus, die welcke heeft ghesonden me vrauwe Margriete, Duwagiereghe van Sauoyen, omme Regente te wesen van Vlaendren ende dese nederlanden.