Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Nae dat die coninc Phelips ende die coninghinne Iohanna, sijn ghearriueert in Spaengien]

Nae dat die coninc Phelips ende die coninghinne Iohanna, sijn ghearriueert in Spaengien, so es die Hertoghe van Neyges ende die Coninck van Arragon, met schonen state van edele mannen hem yeghens ghereden, ende hebben hem met grooter eerweerdicheyt ende blijschappen ontfanghen, ende sijn met groter triumphen ghereyst nae Castilien, ende daer naer sijn blijde incompste ghedaen te Bourges in Spaengien etc.

[fol. CC.xcvij.v]

ITem na der arriuente in spaengien vanden voorseyde coninck ende coninghinne, heeft inden eersten die hertoghe van Neiges als een vroom prinche, met grooten state van edelen Princhen, wesende vanden bloede der voorseyder coninghinnen, hem yeghens ghereden, ende heeft alle dye ghemeynte gheroupen Castilie Castilie, Spaengie, Spaengie.

¶ Item es ooc die Coninck van Arragon hem gherecontreert, ende heeft hem bewesen dat hi grootelic verblijt was, end hebben doe voorseyde schoon soon ende schoon dochtere groot honneur ende eere ghedaen, ende sijn so voorts met groter triumphen ghereyst naer Castilien, daer si seer feestelicke ontfanghen sijn gheweest, ende dye Coninck van Arragon van hem ghescheyden ende ghereyst nae Arragon. Ende heeft daer naer die voorseyde Coninc Phelips met sine coninghinne sijn blijde incomste ghedaen te Bourges in Spaengien, daer dedele mannen ende die staten vanden lande alle vergadert waren, daermen grote dachuaerden hilt, aengaende den Conincrijcke voorseyt, ende oock den huwelijcke tusschen Karolus des voorseyden conincx sone ende ma Dame Glaude dye dochtere van Vranckerijcke, dye welcke omme dier saken wille hadde ghesonden Ambassaden in Spaengien.