MAer dat die coninck ende coninghinne, met hueren edelen state hadden in Zeelant verwacht bequaem weder ende wint, omme hem reyse te volbrenghene. So eest dat Eurus huyten Oosten waeyende, die seylen vanden schepen heeft vpgheloken, ende die voorseyde coninc ende coninghinne met hueren vorsten, edelen, ende alle haren volcke, met vele ruyters, die al ghecleet waren met roode, gheel, ende witte leuereye, tscepe ghegaen, ende heeftmen die claroenen ende trompetten gheslaghen, ende die bussen gheschoten met groote ghetiere in teekenen van blijschapen, maer werde achter na die wellusticheyt verkeert in veruaerthede ende droefhede. Want naer dien dye voorseyde Princhen gheseylt sijn ontrent Inghelant, esser vpt zee alsulcken tempeeste ende torment vp ghestaen, dat sy alle meenden te verdrincken, soe dat si alle gader in grooten noot sijn gheweest, ende hebben moeten kiesen Inghelant, dwelck hoe wel sy niet gheerne en deden met rade van hueren piloten ende patroonen, nochtans omme voorder perijckel te schouwene moesten si daer vlien ende hem salueren. Ende nae dien si ghearriueert waren in Inghelant so sijn die officiers dye tlant ende hauenen verwaerden seer verbaest gheweest van alle den volcke ende mannen van wapenen inden schepen wesende, wanter wel twee duysent duytsche knechten waren, ende dye sommeghe waren ghearriueert in die hauene van Cornuwalie. Ende hebben dofficiers terstont posten ende boden ghesonden aen den coninc van Inghelant Heyndrik die seuenste, die seer verblijt was dat die voorseyde princhen ghearriueert waren ende ghesalueert, ende heefter aen ghesonden heerlijcke Ambassaden, omme hem willecome te heetene, ende heeftse alder eerste te Windsoire, ende daer naer binnen Lonnen seer feestelicke ghetracteert, ende alle vrientschap ghetoont die hem moghelijc was van doene, ende in sghelijcx dye Coninck van Castilien oock, want wes dye coninck van Inghelandt begheert heeft, dat es hem oock ghegunt gheweest vanden voorseyden coninck van Castilien etc. Ende naer dat die selue coninck van Castilien met sijn Coninghinne in Inghelant ghetracteert ende onthaelt sijn gheweest, soe hebben si verwacht weder ende wint, ende sijn met allen hueren state weder ghegaen tschepe met seer groter triumphe ende ghenoechte, want Dinghelsche heeren die hem gheleyden seer heerlicken vp gheseten waren, ende oock Dinghelsche bedreuen seer grote feeste vp di zee, ende heeftmen daer gheschoten ende ghetamboert ende dye trompetten ende claroenen ghesleghen, dwelc een melodye was om hooren. Ende naer dien datse malcanderen adieu gheseyt hadde ende oorlof ghenomen hadden deen aen den anderen, sijn met goeden weder ende saechten winde ghearriueert in Spaengien.
Auteursrechtvrij
