[Item commende weder totten Eertshertoghe es te wetene]
Item commende weder totten Eertshertoghe es te wetene, dat al ende eer dye Eertshertoghe naer Vranckerijcke ghereyst es, heeft die Coninc van Vranckerijcke hem versekert ende ghestelt die princepale edele vanden lande in ostagien, die de naeste van sijnen bloede waren, te wetene die heere van Alenchon, die here van Vendosine, ende die heere van Foues, ende laghen alle drie te Valenchine, in assuerancien van der voorseyde Eertshertoghinne.
¶ Dwelck aldus ghebuert sijnde, es dye Eertshertoghe ghecommen wt Spaengien naer Vranckerijcke, ende heeft sijn intreye ghedaen seer triumphelic te Lyons, daer hi vanden ghemeyne volcke seer blijdelic ontfanghen es gheweest, want si hoepten dat men eenen generalen paeys maken soude vander orloghen die si hadden yegens den coninc van Spaengien, ghelijc tselue ooc gheschiede, wantter eenen paeys ghemaect ende ghesloten wert, ende inder stadt van Lyons wt gheroupen ende ghepubliceert tusschen den coninc van Vranckerijcke ende den Coninck van Spaengien, ende waren daer mede inne ghecomprehendeert, die keyser Maximilianus ende die Eertshertoghe met sijnen ghealieerden. Maer Consalue Fernande Capiteyn vanden Spaengiaerden, als niet wetende vanden paeyse heeft gheslaghen vpdie fransoysen, ende Napels inne ghenomen, so dat die heer van Daubigny naer der doot vanden hertoghe van Nemours ende den edelen die te Napels versleghen waren gheuloden es met sijnen cleynen ghetale van volcke na Calabren.
Auteursrechtvrij