Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item in desen tijden so es die Eertshertoghinne gheleghen van eenen ionghen sone, ende es ghenaemt gheweest

Ferdinandus naer den grootvader Ende heeftmen grote triumphe bedreuen, midts der ghebuerten des selfs.

¶ Item inden voorseyde iare.xv^c.ende een heeftmen sien vallen ontrent duytsch lant, bloedege cruycen vpten cleederen vanden menschen, dwelc gruwelic was omme te aenschouwene, hoe wel dat tanderen tijden noch ghebuert es dat bloet ghereghent heeft, te wetene inden iare seuen hondert ende.lxxxvij.ende int iaer.M.C.ende.xiij.ontrent Rauennen ende Parmen. Ende oock bi keysers Ottho tijde vielender bloedege cruycen. Es te weten datter so vele vreemde dinghen nyet en gheschieden, ten wort bi ghescrifte gheuonden by den ghenen die autentijcke hystorien lesen, tanderen tijden noch ghebuert te sijne. Ende inden seluen tijde heeftmen gehoort van Sophis.coninc.van Perssen, die hem vyant heeft gehouden vanden Turc.