Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Naer dien die voorseyde Eertshertoghe ende sijn edele Princersse voorseyde]

Naer dien die voorseyde Eertshertoghe ende sijn edele Princersse voorseyde, ghecommen sijn totter fonteynen vander coninghinnen, soe es hem daer ghegheuen een gulden lelye met vijf gulden tacxkens, springhende huyt elck tacxken een fonteynken. Ende voor dye schilders poorte stont een ander tabernacle vo musiciens ende speellieden, onder die welcke inden middele sadt een personagie representerende Dauid den herpslagere, ende onder tvoorseyde tabernacule stont ghescreuen aldus.

Dauid cum cantoribus cytharam tangebat
Nunc venit carminis etas
Redemit saturnia regna.

[Item inden iare.xvc.ende.iij]

¶ Naer desen commende voorts duer sinte Dionijs strate, dye al behanghen was met tapijtcerie voor het Chatelet, es daer weder ghethoont een stellagie, rijckelick verchiert met tapijtcerie, ende inden middele der seluer stont een fonteyne, ende was ghenaemt Kons scientie, ende stont int vpperste vander

[fol. CC.xciij.v]

fonteynen eene schone goddinne, gheabijtueert met witte sijde, ende met hanghenden hare, hebbende beyde haer handen in een boec, ende was dese goddinne ghenaemt Sciencie. Voor aen die stellagie stont een personagie ghenaemt Paris met eenen gheschakierden sijden rocke, maer was onder gheharnascht, ende hadde in sijn hant eenen witten stock, ende neffens desen Paris stont een personagie ghenaemt Pastor pacisicus, chierlic toeghemaect, hebbende in sijn hant een crootse, ende noch drie herderen stonden noch vp dye selue tabernakele, ghecleet met roode sijde, ende noch een schaepherdersse met blaeu sijde ghecleet ende die voorseyde drie herderen waren ghenaemt, den Cor fidum, ghetrouwich herte, dander Via recta, rechten wech, die derde Bona voluntas, goeden wille, ende die herdersse was ghenaemt Pax peys, ende die voorseyde drye herderen metten vrouken songhen sulcken liekens in walssche Ouer dander sijde vander stellagien stonden seuen persoonen, te wetene dye seuen vrye consten, Grammatica, Physica, Geometria, over de rechte sijde Rethorica, Astrologia, ende Musica ouer dander sijde, ende in middele van dien Theologia. Ende dit ghesien hebbende, sijn die voorseyde Prinche ende princersse met hueren gheselschape ghereden ouer die wisselbrugghe, ende so voorby onser lieuer vrouwen kercke, ende sijn hem daer te ghemoete ghecommen, die princepale vander vniuersiteyte van Parijs, ende es van weghen der seluer bi eenen meester inder godheyt ghegruet ende willecome gheheeten. Ende es dye voorseyde Eertshertoghe van sijnen peerde ghetreden ende ghegaen tot in die kercke van onser lieuer vrauwen, ende al daer vanden clercken, met grooter eeren ontfanghen, ende daer naer ghegaen voor den outaer van onser lieuer vrauwen, ende heeft al daer bloots hoofts vp sijn knyen sijn gebet ghedaen. Ende van daer voorts ghereden achter den Augustijnen cloostere, ten huyse van den Gouuernuere van Parijs, daer hi heerlicken ghetracteert es gheweest. Des anderen daechs naer dien dye Eertshertoge misse ghehoort hadde, es hi ghegaen nae tpaleys, ende sijn hem die heeren vanden parlemente te ghemoete ghecommen, ende hebben hem blijdelick als een coninc ontfanghen in tselue parlement, ende es van daer ghereden tot sijnen logijse, ende sijn in teekene van blijschapen die mesdadeghe ende gheuanghene ghelost huyt der vanghenesse ghelijc oft die coninc selue gedaen. Nadien die Eertshertoge die voorseyde stadt met sijn gheselschap ouersien heeft, es hy des sondaechs daer naer ghereyst naer Orleans, ende heeft al daer sijn incomste ghedaen vp sinte Barbaren dach ontrent den twee hueren naer noene, ende es oock inder voorseyder stadt seer blijdelick ontfanghen, ende sijn hem die heeren ende dofficieren vander stadt heerlick yeghens ghereden, alle ghecleet met rooden schaerlaken. Ende waren die straten daer hy duer reet behanghen, ende bouen waren dye straten al ghedect ghelijcmen daer ghemeenlijck doet alsmen thelich Sacrament omme draghet. Ende was gelogeert by sint Amaens kercke int huys vanden coninc. Ooc was die voorseyde Eertshertoge ghegruet vander vniuersiteyt van Orleans, metten Procureuren vanden nacien, van eenen doctuere inden rechten, met een schoone latijnsche Oracie, die welcke hem ghenaeme es gheweest, ende sijn daer ooc ghelijc in alle dandere steden die gheuanghene huyter hachten ghelost.