Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item me Ioncfrau Margriete hertoge Phelips sustere]

Item me Ioncfrau Margriete hertoge Phelips sustere, trac huyt Henegauwe naer die stede van Antwerpen, omme die bruyt van hueren broedere daer te ontfanghene, ende sadt in eenen osbare, ende quam daer met schoonen state seer rijckelic, als ghecleet seer costelic in witten gulden lakene. Ende achter haer quam me vrauwe van Rauesteyn te peerde, al wit ghecleet in schoonen costelicken sijden lakene, met vele Ioncfrauwen achter haer te peerde, die oock seer rijckelijc verchiert waren. Ende daer quamen.viij.vergulden waghenen rijckelick verchiert met vrauwen ende Ioncfrauwen. Ende so huyten Osbare ghebeet sijnde met al haren gheselschape, ende ooc met eeneghe heren van der oordene, ghinc ende ontfinck ende willecoemde die bruyt vanden edelen hertoghe Phelips met seer groter vrientscap, twelc schoone om sien was.