Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxx.sten dach in Meye was te Brugghe den paeys ter hallen huytgheroupen]

[Vp den.xxx.sten dach in Meye en vp den.ij.sten dach van Wedemaent]

Item vp den.xxx.sten dach in Meye was te Brugghe den paeys ter hallen huytgheroupen, present den capiteyn, den heer ende der wet. Ende was ghelesen in vorme van eenen plackate, present eenen heraut vanden hertoghe Phelips, betoghende dat hy den paeys ghebrocht hadde, ende daer waren twee barnende toortsen ter veynstere huytghesteken ter wijle datmen den paeys huyt riep, ende huyt gheroupen sijnde, men saeyde ghelt ter veynsteren huyt van blijschepen, ende die toortsen waren neder gheworpen te rapene diet gheliefde, ende men beyaerde in alle kercken vander stede van blijschapen. Ende vp den.ij.sten dach van Wedemaent, soe waren te Brugghe in diueersche straten schone vieren ghemaect, daer wijn mede te winne was, ende esbatementen speeldemen in den burch, daer ooc prijsen van wijne mede te winnen waren.