Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xxviij.sten dach van Meye was den groten Raet van Brugge weder vergadert]

Item vp den.xxviij.sten dach van Meye was den groten Raet van Brugge weder vergadert ter cause van die twee guldenen voorseyde, die welcke die capiteyn begheerde te hebbene omme dye orloghe te sustineirene. Waer vp dat verantwoort was dat die hertoghe van Zassen soude doen ghelijck als in die laetste dachuaert ghesloten was ende belooft, dat was dat tgat vander Sluys open gaen soude,

[fol. CC.lxxv.r]

ende dat den coopman soude moghen varen ende keeren vry onghemolesteirt, ende tgarnisoen doen vertrecken huyten lande, ende dan souden sijt gheuen gheerne ende minlicke alsoot ghesloten was.

¶ Item vp den seluen tijt so was die gaerde ontrent Cortrijcke, daer si veel ruytheden bedreuen vp die lantslieden ende foortse. Om twelcke die heere van dier prochye niet wel te vreden en was, ende si dreechden hem doot te slane, waer omme hi sprac met eeneghe van sijnen naesten prochyen, ende sy sloten te gadere datmen die clocken aen een boort slaen soude soot ghebuerde, so datter veel volcx vergaerde, ende quamen daer die gaerde lach ende beuochtense, so datter veel doot bleuen ende gheuanghen vander voorseyde gaerde.