[Item den.vi.sten in Maerte vp den vastenauent dach]
Item den.vi.sten in Maerte vp den vastenauent dach, soe wasser een steicspel ghehouden te Brugghe vp die vrydachs marckt, waer of berouper was Lodewijc metteneye, sone van mer Cornelis metteneye Schoutheeten van Brugghe, in sadelen van orloghen, met ghecroonde speeren. Ende daer quam yeghens hem een Spaengiaert ende noch een ander edel man, welcke twee staken yeghens den beroupere, so datter diueersche speeren ghebroken waren. Ende die voorseyde beroupere stac den Spaengiaert sijn harnasch of vp sijn schoudere, ende tpeert vanden andere man en wilde doe niet meer loopen. Ende dese berouper beriep noch eens al dat commen ende gaen wilde, omme tsondaechs daer naer den xi.sten in Maerte vrouch inde bane te sijne Ende daer versaemden in die bane vp den seluen dach wel.xi.personen, al int vulle harnasch, elc met sijnen gheselschepe, daer of datter een was die stedehouder vanden capiteyn vanden Damen, die welcke was seer rijckelic verchiert, ende een Spaengiaert ende een duytsch heer, ende meer andere inwonende van Brugghe. Ende die beroupere antwoordese alle diere quamen, ten minsten tot.iij.
Auteursrechtvrij