Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den seluen tijt was te Ghendt ghehouden een collacie]

Item vp den seluen tijt was te Ghendt ghehouden een collacie omme te seyndene byden hertoghe Phelips omme te gherakene teenen goeden paeyse. Ende Ian van Coppenolle metten sijnen en was van dien aduijse niet, want hi begeert hadde van elcken huyse binnen Ghendt staende.ij.schellingen groot, maer anders was haerlieder meeninghe, als datmen soude ordonneren xij.persoonen die maniere vinden souden omme tghelt te ghecrijghene, om tot eenen goeden paeyse te gherakene. In twelcke si niet en consten accorderen, waer of rees een grote beroerte binnen Ghendt, so dat als doe doot ghesleghen wort den Deken vanden wulleweuers ende noch meer andere, ende daer wassere veel gheuanghen. Ende dyt gheschiede vp den.xxix.sten dach van Septembre.Anno.xci.

¶ Item eeneghe vanden garnisoene van mijn heere van Nassauwe trocken te Neuele ende daer ontrent, te wetene duytschen ende Inghelschen, die welcke daer ghinghen om eenen roof te doene, maer seer lettele van die daer ghinghen keerden wedere, want si ghescoffiert waren van die van Ghendt, ende bleuender meest al doot ghesleghen. Ende dit was vp den tweesten dach van Octobre Anno.xci.

¶ Item dye van Ghendt waren ontboden te Denremonde, ende hem lieden was beloeft die stede ouer te gheuene, twelck also niet en ghebuerde, maer die van Ghendt ghinghen daer wel met.vi^c.mannen vanden welcken datter wel.ij^c.doot bleuen ende wel.ij^c.gheuanghen, ende doen quam die mare dat Coppenolle gheuanghen was, maer ten was so niet.

[Den.vi.sten dach van Octobre]

¶ Item inden seluen tijt verloren die van Ghendt Hulst, ende dat was inghenomen van Petijt salasaert, ende mijn heere van Waesmunstre den.vi.sten dach van Octobre. Anno.xci.