[Item es te wetene, dat die voorseyde ghecommitteirde weder waren als doe ghesonden ten Damme aen mijn here van Nassauwe]
Item es te wetene, dat die voorseyde ghecommitteirde weder waren als doe ghesonden ten Damme aen mijn here van Nassauwe, ende gauen daer hem te kennene hoe dat te Brugghe stont, ende vielen hem te voete, biddende om een vriendelick apointement, ende vertoochden hem hoe alle tvolck paeys ende sijne vrientscap begheerden. Ende mijn here van Nassauwe vertoochde onse ghedeputeirde van Brugge vp wat condicien dat si paeys hebben mochten. Ende des anderen daechs quamen onse ghedeputeirde vanden Damme, ende dambochten ende al tghemeente was vergadert, ende daer gafmen hem lieden te kennene, hoe dat mijn heere van Nassauwe begheerde te hebbene vander stede van Brugghe vanden inwonende van diere.lxxx.duysent ponden groten ten drien paeymenten. Ende alle die ghene die cause gheweist hadden vander orloghe, die welcke Ioris Pycauet alle bedreghen hadde, want si alle daghe raet met hem hilden, die begeerde hi tsijnen wille, welcke personen hem al meest absent hilden, maer waren daer naer vele ghecreghen ende gheiusticiert. Ende hier vp was den paeys gheconcludeirt. Ende mijn here van Nassauwe sandt om der obediencie dye si hem betoocht hadden, twee sticken Rijnsch wijns, dye welcke ghesconcken ende ghepresenteirt waren der wet hooftmannen ende Dekens.
Auteursrechtvrij