Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item te Brugghe was en ghebodt ghedaen]

[Den.v.sten dach van Nouembre en den.vi.sten dach in Nouembre]

Item te Brugghe was en ghebodt ghedaen, dat alle die lantspeerden die in Brugghe waren, dat si alle ghereedt souden sijn omme te halene vitaelgie, als coorne ende andere saken, ten oorbore vander stede van Brugghe ende vanden inghesetene van diere. Die welcke terstont ghereet waren tot.ij^c.of meer, ende hadden met hem lieden ontrent.C.mannen van wapenen, ende vertrocken van Brugghe den.v.sten dach van Nouembre ten.vij.hueren of daer ontrent, ende voerden met hem lieden sacken om coorne in te doene, twelc oock al gheladen was ter sluys. Ende int wederkeeren als sy om dye vitaelgie gheweist hadden, waren beleyt ten.ij.plaetsen daer si passeren moesten metter voorseyde vitaelgie, te wetene vp den wech van Vyuen ende bi Spermaelgien, wel met.iiij^c.peerden, ende.vi^c.voetvolcx, ende waren ghestelt daer dye voorseyde van Brugge passeren moesten, so dat alle dat voetvolc dat metten voorseyde wagenen was, wiert al meest gheuanghen, ende si voerden alle die wagens metter voorseyde vitaelgie ten Damme, ende mijn heere van Nassauwe was daer selue mede in persone. Ende quamen dien dach voor die stede ende daden daer vele quaets van branden ende andersins. Ende dit ghebuerde Anno.M.iiij^c.ende.xc.den.vi.sten dach in Nouembre.

¶ Item hier te voren vp sinte Luycx dach.xviij.in Octobre drouchmen te Brugghe processye generael metten weerden heleghen bloede binnen der kercke van onser vrauwen, omme den almoghenden god te biddene om eenen warachteghen paeys, want men als doe hoepte dat mijn heere van Nassauwe ghetrocken soude hebben ter sluys bi mer phelips van Rauesteyn, waer toe eene dachuaert als doe ghestelt was, maer mijn here van Nassauwe en quam daer niet.