Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item int besoengieren vanden paeyse totten slote toe]

[Den laetsten dach van Decembre]

Item int besoengieren vanden paeyse totten slote toe, so en greydet niet wel mijn here Phelips van Rauesteyn naer sijn aduijs, waer omme dat hi dede seere fortifieren ende bebollenwercken het grote casteel ter sluys, want hy duchtede dat den paeys niet gheduerich sijn en souden, ende niet wel en soude ghehouden worden, aenghesien datmen nyeuwers vredelic en mochte reysen sonder saufconduyt. Ende oock omme die munte die so different was ende buyter reghele ghinc, want een roosen nobele dede.xxviij.schellingen, ende den leeu.xv.schellingen groten, die croonen.xij.schellingen groten, dandries guldene.x.schellingen, Hutrechtsche guldene.viij.schellingen, een Rijnsch gulden.ix.schellingen, een postulaet.v.schellingen groten. Ende het seluere ghelt eenen grooten dede een placke, vier groten dede.ix.groten, den penninck metten.ij.leeuwen dede.x.groten, ende also al dander ghelt in aduenante seere hooghe ende buyten alder weerde. Vanden welcken een slot ghesloten was, als datmen tghelt of stellen soude vp den ouden ende eersten ganck, waer omme dat tvolc seere murmureirde ende beroert was aenghesien het grote verlies dat daer aen wesen soude, want het volc al noch tot den laetsten dach van Decembre altijt in diuisie ende in.ij.partyen waren, hoe wel datter nochtan een ghebot ghedaen was, vp die verbuerte van sijnen lijue dat neyement gheen partyeschip draghen noch houden en soude.

[Vp den.xxvi.sten dach van Decembre]

¶ Item vp den.xxvi.sten dach van Decembre so was ghemaect Scouteetene van Brugge die here Ian de Witte dhoude, ende was hem dye roede ghegheuen huyter name vanden coninc vanden Romeynen, als voocht ende momboor van onsen natuerlicken here ende prinche den hertoghe Phelips. Ende alsoo deden si alle eedt die in wetten saten.