[Item vp den.xvi.sten dach vander seluer maent]
Item vp den.xvi.sten dach vander seluer maent, so waren die heren van Brugghe als noch ghebleuen Typre, bi monseur de cordes, omme te hebbene een quantiteyt van fransoysen omme te legghene in onse stede ende casselrye, omme bi dien te weerene dye vianden ende quaetwillende van onser stede. Ende aldus quamen si te Brugge den.xviij.dach vander seluer maent metten fransoysen wel drie duysent sterc. Waer of die princepale heren waren, dye graue van Vendomme, ende mijn here van Peenen, ende noch meer andere Capiteynen daer mede omme die vyanden te weerene, soe sy begonsten midts dat sy onder weghe herwaerts commende, brochten mede.ix.gheuanghene, ende waren alle ouergheloopen ghesellen van hier binnen den lande gheboren, waer of die.viij.te Brugghe vp dye marct aen een galghe alle gheuanghen waren, ende die.ix.ste die hadde gracie, want hi noeyt maer eens met hem lieden huyte gheweist en hadde, dies moeste hi dander.viij.alle selue metter hant hanghen, so hy dede, ende daer mede wan hi sijn lijf ende men lieten loopen sijnder veerde. Ende dit ghebuerde vp den.xviij.sten dach van der maent van Iulius.
Auteursrechtvrij