Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.vi.sten dach van sporcle so quam monseur descordes te Dornicke]

[Vp den.vi.sten dach van sporcle en den.viij.sten dach van Sporcle den.vij.sten dach van Sporcle]

Item vp den.vi.sten dach van sporcle so quam monseur descordes te Dornicke, om al daer metten heren van vlaendren ende metten.iij.leden slants te spreken ende te communikierene, als aen gaende der orloghe die.iij.leden slants ende alle die hem die orloghe aentrocken vanden anderen steden, waren al te Doornicke versaemt den.viij.sten dach van Sporcle. Ende also si consilie hilden onder tale ende wedertale tot den auende toe, so gaf antwoorde monseur decordes den seluen ghedeputeirden, ende den.iij.leden slants van Vlaendren, dat si vp houden souden van repliquierene voorder in die materie, ten ware dat sy al voren spraken met malcanderen, als aengaende vanden.ij.gheuanghenen dye noch te Ghendt laghen, die welcke hi tanderen tijden begheert hadde ende als noch begheerde, te wetene mijn here van Nassauwe, ende mijn here van Polem, omme die te doen hebbene in sijnen handen. Ende dat ghedaen sijnde, soude grotelicken ons vrient wesen, ende hadde altoos gheweist, ende wilde als noch blijuen, meerder dan noeyt te voren, doende hem sijne bede. Vanden welcken die van ghendt last hadden hem dye te consenteirene, ende in sghelijcx dye van Ipre, sonder die van Brugge diet noeyt gheconsenteirt en hadde, noch al doe noch gheen last en hadden te consenteirene maer om weldoens wille ende ter begeerte van monseur de Cordes, baden dat hem ghelieuen wilde hem lieden te consenteirene dat si mochten scrijuen aen die vander wet, hoofmannen ende Dekenen vander stede van Brugghe, dat si het commuyn daer vp wilden doen vergaderen, ende hem lieden die begheerte van monseur de Cordes te kennen te gheuen. Ende dit doende so beloofde monseur de Cordes dat hi die grote gaerde van vranckerijcke bringhen soude int westlant, om al dat quartier te bringhene ter successie vanden lande van Vlaendren daer si behoorden, met vreese van orloghe of by constrainte van dien, ende van danen niet te scheeden ten soude also ghebuert wesen byden capiteynen daer toe gheordonneirt, te wetene monseur de Cordes, mer Phelips van Rauesteyn, ende mijn here van peenen, ende meer ander Capiteynen. Ende dit was den volcke van Brugge te kennene ghegeuen den vi.sten dach van sporcle. Ende vp den seluen dach wast gheconsenteirt dat hi die.ij.gheuanghenen hebben soude, te wetene mijn here van Nassauwe, ende mijn heere van polem vp die belofte die hi dede ende weder te keerene eene obligacie van.xij^m. die hi hadde vanden lande ter cause van schade ende intereste die hi ghehadt hadde ter cause van onser orloghe. Aldus wast hem gheconsenteirt, maer hy en soude die mannen niet hebben, ten ware dat hi ware metsijnder armeye binnen den westquaertiere, ende daer sijnde soudemen hem dye twee gheuanghenen bringhen in sijnen handen. Ende die van Ghendt ende die van Ipre leuerden hem die gheuanghenen den.vij.sten dach van Sporcle, vp dat hi vulcommen soude tghene dat hi belooft hadde, ten oorbore van onsen natuerlicken here den hertoge Phelips.