Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item ende omme die versekerthede van al dies voorseyde es]

Item ende omme die versekerthede van al dies voorseyde es, wi sullen sweeren vp die heleghe Euangelie, vp thelich hout des cruys, vp tcanon vander messe, ende vp dat helege sacrament, dat wi sonder inbreken sullen onderhouden ende vulcommen die voorseyde tractiet van pointe te pointe, sonder nemmermeer te procureiren noch te doen procureirene ter contrarie, ons stellende ende submitterende tallen kerckelicken censuren, niet yeghenstaende dye preuilegien die wi als nv coninck vanden Romeynen moghen hebben ter contrarien.

¶ Item ende bouen dyen sullen ter begheerte van ons onse heleghe vader den paeus, den Keyser onsen beminden vadere, ende die.vij.Curuoorsters, die voorseyde heeren vanden bloede, ende die voorseyde staten van alle die landen ten contentemente van die van Vlaendren, ende ooc die bisschoppen van Vtrecht ende van Luycke, ende die hertoghe van Cleuen ende van Ghulicke confirmeren den seluen paeys met hueren openen brieuen ende seghelen, ende dien belouen te onderhoudene, ende ons gheen assistencie noch bystant te doene ter contrarie. Ende daer toe mede die voorseyde bisschoppen van Vtrecht ende van Luycke, metsgaders den Hertoghe van Ghulicke ende van Cleuen sullen belouen ende hem lieden verbinden niet te gheuene eenege passaegien duer huerlieder landt ofte Riuieren eeneghen volcke van orloghen dat souden willen commen vp Vlaendren.

¶ Item ende voortconsenteren wi, dat waert so dat god behoe, dat wy in eenegher manieren yet daden of ghedoochden te doene yeghens dyt tractiet, of eenich point van dien, dat in dat caes sonder ander of meer declaracien daer of te doene, dye voorseyde heren vanden bloede, die heeren vander oordenen vanden gulden Vlyese, staten ende inghesetene vanden voorseyde landen, sullen ipso facto nv als dan ende dan als nv ontsleghen sijn van hueren eede, ende oock ontlast van alle beeden subueniencien, pencioenen, of andere lasten ons gheconsenteirt of te consenteirene, ende van alle achterstellen van dien. Ende in sghelijcx dye van Vlaendren van haren pencioene voorseyde. Ende die voorseyde andere landen ende steden van onser subiectie ende onderdanichede sullen ghehouden sijn te assisteirene ende succoereirene die voorseyde van Vlaendren. Ende van dan voort sullen ghegouuerneirt ende gheregiert sijn onder den name van onsen beminden sone bi die voorseyde vanden bloede, ende byden Rade int lant, also die van Vlaendren nv gheregiert worden.