Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item ter neernster bede vanden voorseyde heren vanden bloede ende van dye ghedeputeirde vanden staten]

Item ter neernster bede vanden voorseyde heren vanden bloede ende van dye ghedeputeirde vanden staten, ende ooc ter ootmoedegher bede vanden voorseyde poorters ende inghesetene vander stede van Brugghe hebben gheaboligiert vergheuen ende quijte ghescholden teeweghen daghen thouden, ende arrestacie van onsen persoon, metsgaders al tghene datter ghebuert ende gheschiet es voren of naer, by wien of hoe in wat manieren het sy, dat vergheuen gheheel ende al, als niet ghebuert.

¶ Item des ghelijcx ter bede als bouen, hebben vergheuen al tghene dat byden.iij.leden tslandts van Vlaendren, ende elcken van hem lieden int generale ende partijculiere mesdaen, of mesbuert mach sijn yeghen onsen persoon. Ende adherende den volcke van Brugghe houdende ons ghearresteirt in hueren name, ons doende vyantschap ende orloghe vp hem seluen, of te gadere blamerende of iugerende ons of die onse bi faeyte, bi woorden of andersins, in wat manieren het si, sonder ter cause van dat voorseyde es, of eeneghe andere saken voorleden hem lieden den ghereserueirden byden paeyse van Vlaendren ghemaect. Int iaer.lxxxv.noch ander nemmermeer yet te heesschene, te doene, of laten heesschene, int generale noch in tparticuliere, in lijue noch in goede, buyten noch binnen den lande, noch andersins in gheen der manieren.

¶ Item die voorseyde van Vlaendren ter contemplacien van ons ende vanden heeren vanden bloede, ende ooc ter begheerte vanden ghedeputeirden vanden staten hebben vriendelick ende liberalick vergheuen ende quijte ghescholden, vergheuen ende schelden quijte by desen alle lachteren, cleenicheden ende vyolencien, die hem lieden ghedaen hebben gheweist huyt causen vanden diuisien, by wien hoe en in wat manieren het sy, sonder eeneghe exceptie ofte reseruacie, alsoo wel in tconsenteren vanden diueerschen settinghen, sonder eendrachtich consent vanden leden als andersins, dat ooc verghetende als niet ghebuert. Ende consenteren dat elck paeysiuelick weder keeren ten sijnen, inden staet dat hijt vinden sal sonder ter cause vanden seluen diuisien hem lieden nemmermeer yet te moghen heesschene of te verwijtene.

¶ Item dat alle andere die ter cause of onder tdecsele vanden seluen deuysien gheoffenseirt, gheiniurieirt, ofte gheuyoleirt hebben gheweist in lijue of in goede, ofte ooc andersins, in wat manieren het ooc ghebuert sy, sullen insghelijcx dat oock al

[fol. CC.l.v]

vergheuen ende al vergheten, sonder nemmermeer questie of vermaen daer of te makene.

¶ Item waert bi al dien dat yement handelinghe ghehadt hebbende van eeneghen penninghen, het sy van ons ofte van onsen beminden sone, ofte van eeneghen landen, steden of Casselryen hem ghemessuseirt hadde in sijne voorseyde administratie, ende dat ment beuonde dat hi gheappliquiert hadde te sijnen singulieren profijte eenege van den voornomden penninghen, sal ghehouden sijn daer of te verantwoordene ende te rechte te stane daert ende alsoot behooren soude.

¶ Item waert ooc dat yement voor die diuisien sonder cause of redene bi verdreeghinghe, foortse, of crachte, quade listen of practijcken ghecreghen hadde van yemende eenich goet, het sy seluere, ghelt, huysen, landt of andere yuweelen, of cattheylen, die sal insghelijcx ooc ghehouden sijn te antwoordene daert behooren sal, ende recht te ghenietene vp dye restitucie vanden seluen goede of ghelde ciuylick sonder meer.