[Item vp den.xvi.sten dach van Meye. Anno.M.iiijc.ende lxxxviij.]
Item vp den.xvi.sten dach van Meye. Anno.M.iiijc.ende lxxxviij.so was gheordonneirt een solempnele processye generale, in die welcke ghedreghen was het weerde helege sacrament, ende den fiertre van mijn heere sinte Donaes, ende ooc tweerde helich cruyce dat rust tonder vrauwen Ende die processien commende vp die marct, quamen metten collegien vp die voorseyde staedgie, daer eenen schonen outaer vp ghetemmert was, daermen theleghe Sacrament, tweede helich cruys vp stelde, ende den fiertre van sinte Donaes. Doen quam die Roomsche Coninc die vp die voornoene outsleghen was van alle den letsel ende bewaringhe van Cranenburch met sijnen state vp dye voornomde staedgie, daer hy knyelde voor den voornomden outaer, daer vergheuende alle voorledene saken die gheschiet waren, hoe of in wat manieren. Ende daer was den paeys ghemaect inder manieren als ghi hier naer horen sult, in die presencie van mijn here den suffragaen van Doornicke, ende meer andere gheestelicke personen. Ende die Roomsche coninc ghinc metten processien van daer tot in sinte Donaes kercke, daer mijn here Phelips ooc sijnen eedt dede den paeys tonderhoudene, welcken eedt hi wel ende ghetrauwelic hilt, ende track naer Ghendt met sijnen state, daer hi wel ende eerlick ontfanghen was. Ende die Roomsche coninc trac byden keyser sijnen vadere met sijnen state. Ende den voorseyde paeys was te Brugghe ter hallen huyt ghepublieert, hoe wel dat hi niet lange ghehouden en was, want tsanderdaechs daer naer was verbarrent tcasteel van Male, ende meer huysen ende hofsteden daer ontrent, vanden volcke vanden Roomschen Coninck.
Auteursrechtvrij