Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Dit ghesciede sdysendaechs ten steicspele, ende sauents ten banckette.

ITem mijn heere van Lutcenburch was byden Ruese ende byden Naen gheleet, om reuerencie te doene den vrauwen, ende van daer voor die Iugen, Ende sijn outsuere ende cleedinghe was van orfeuerye vergult, ende hy hadde.v.paedgen, ghecleedt met orfeuerye. Deerste hadde sijn peert verchiert met blaeu selueren lakene. Die tweeste van laken van Damast, gheborduert van orfeuerye wit, met grooten troncken van bellen van seluere. Die derde van swarten fluweele, gheborduert met groten griecschen Y van goude. Dye vierde met maerters, metten ruwen huytewaert. Die.v.ste met gulden laken cramosijn.

¶ Item dye voorseyde gheuanghen Ruddere byder vrauwe vanden verborghene Eylande was verchiert met fluweele tanneyt, met barbacanen ende letteren van gouden draden, ende huyten barbacanen vloghen viereghe vlammen. Ende omme dieswille dat tarreest van mijn here van Lutcenburch ghebroken was, hi schiet van daer, sonder te vulcommene tvoorseyde capittele, twelcke hem die gheuanghen Rudder consenteirde.

¶ Item dye incomste van mijn heere van Arguwe, hi was ghelijck den anderen gheleet byden voorseyde Ruese ende Naen, ende hadde sijn peert verdect met peerschen fluweelen laken, gheboort met selueren laken, ende hy hadde drie paedgen ghecleet met paltrocx van groenen fluweel. Deerste sijn peert was verchiert met schoonen gulden lakene cramosijn. Dye tweeste was verchiert met peerschen fluweele. Dye derde met behanghen blaeuwen fluweele, met selueren bellen. Ende die voorseyde here van Arguwe hadde sinen schilt ghedeelt blaeu ende groen, ende hi brack.xiij.glauyen.

¶ Item doe quam die gheuanghen Rudder weder huyte, verchiert met wit laken van damast, besaeyt met gulden tranen, ende dye voorseyde gheuanghen Ruddere brac ooc xiij.glauyen.

[fol. C.xlij.r]

¶ Item dye incomste van mijn heere Anthonis van Halwijn was byden Ruese ende Naen gheleet als dander, omme den vrauwen te doene reuerencie. Ende hi hadde sijn peert verchiert met swarten fluweele, gheborduert met gouden draden, in manieren van roosen met grote selueren bellen. Ende dye borduere van sijnder verdecxsele was van gulden laken cramosijn, ende met gheborduerde griecsche Y Y. Ende hy hadde drie paedgen ghecleet met orfeuerye. Deerste was verchiert met graeu gulden lakene. Die tweeste van orfeuerye wit, met grote doppen van seluere. Die derde met fluweel cramosijn van selueren lakene. Ende dye voorseyde heere Anthonis van Halewijn brac vijf glauyen seere clouckelick.

¶ Item dye gheuanghen Ruddere quam huyte verchiert met selueren laken cramosijn, gheborduert ende besaeyt met orfeuerye, ende brack drie glauyen.

¶ Item hertoghe Kaerle was ghecleet met eenen langhen keerele van gouden orfeuerye, gheuoert met sabels, ende sijn paedgen ende voetloopers hadden graeu fluweelen keerls

¶ Item sauens ten banckette waren ghedeckt alle die voorseyde tafelen, ende daer waren doe gherecht.xxvi.schotelen roost, ende.xxvi pasteyen, elc verdect met een pauwelioen metten wapenen vanden Landen vanden voorseyde Prinche. Ende vp elcke pasteye stondt een man bouen hebbende eenich engien, om die pasteye vp te brekene, deen een spade, dandere een hamere, die derde een pijcke, ende ouer troost stonden tenten verchiert met wapenen vanden landen ende steden toebehoorende onsen natuerlicken heere ende prinche den Hertoghe Kaerle voorseyde. Ende met sijnder deuijse, te wetene, Ie lay emprijs, ende twoordt vander voorseyde me vrauwe Margriete, bien en auienge.

¶ Item daer was ooc in de voorseyde sale ghestelt eenen torre rijckelic ghestoffeirt, naer den torre van Gorckem in Hollant, in welcken torre was wonder te siene, daer waren inne gheeten die vp die scalmeye speelden ende vp trompetten. Ende daer waren ghemaect Ezels die songhen, ende daer waren Euerswijnen die speilden vp grote fluyten ende daer waren Beeren die speilden vp Luten ende elck dede tsine bi ghebuerte, dies wasser een vp den voorseyde thorre dye tusschen elcke poose een ghenoughelick dichtkin seyde. Ende ten laetsten quam daer een Scemijnckel twelck danste den morisschen dans, daer omme dat seere ghelachen was, welck Scemijnckel vandt vp den torre een mersman ligghen slapende. Ende tscemijnckele nam die speghelen, spellen, ende cammen, ende drouchse den ioncvrauwen, twelck een boerdelic dinck om sien was