Dietsche Warande en Belfort. Jaargang 94

[p. 544]

K. Vangenechten
Ego flos

Carmen mysticum
quod, vesperascente vita, condidit
Guido Gezelle,
e Flandrico in Latinum sermonem conversum.

Flos ego et coram te oculis tuisque,
solis immensum radiis vigesco
lumen, hanc et quod modo sempiternam

das mihi vitam.

Flos ego et pando folia arta mane,
vespere occludo; pariter vicissim
exsequar semper redeunte sole

occiduoque.

E tua flamma mea vera vita;
lucis expers, mors mea tota vita;
quidnam enim tuto nisi te tenerem

diligeremve?

Tabe longe abs te peredor remotus
qui tamen rerum genitor perennis
igne mortalis penetras feraci

viscera in ima.

Tolle, te quaeso, mea vincla tolle;
erue, extirpa; fac eam coruscat
ver ubi florens, ubi tu renides,

flos speciose.

Dirue inter nos spatia illa iniqua;
tempus expellas, mora quaeque cedat;
luce me suavis recreet serena

patria tellus.

Ante te sistam, magis: induam te,
dum mihi vitam tribuas beatam,
me tuum aeternum modo largiare

lumen inire.