Dietsche Warande. Nieuwe reeks 2. Jaargang 10
(1897)– [tijdschrift] Dietsche Warande–
Gedeeltelijk auteursrechtelijk beschermd
[pagina 381]
| |
 | |
Een liederen-handschrift
| |
[pagina 382]
| |
O Jesus mijn alderliefste heerGa naar voetnoot(1)
naer u verlanckt mij al te seer
nae u staet mijn verlangen
leijt mij wt deser weirelt valsch
Met u soo wil ick ganghen
O siele mijn alderliefste bruijt
ghij moet u lijden dit leven wt
ten sal toch niet langhe dueren
wildij comen daer ick ben
ghij moet wat bat besueren
O heer het dunckt mij wesen goet
helpt mij wt mijnen crancken moet
en wilt mij u gratie geven
op dat ick desen corten tijt
altijt in duchden mach leven.
Tis mij alte groote pijn
so langhe van u gescheijden te sijn
och mocht eens anders wesen
soo waer ick van allen mijn druck
oock altemael genesen.
Dochter sijt blij hebt goeden moet
het sal hier naemaels wesen goet
en wilt u niet versagen
als ghij meest in lijden sijt
Ick salt u helpen dragen.
| |
[pagina 383]
| |
O heer en helpt ghij mij niet
so waer ick in soo grooten verdriet
in al soo grooten lijden
waer ick mij weijn waer ick mij keer
altijt soo moet ick strijden.
Och mocht ick comen daer ghij sijt
ick liet daerom die weerelt wijt
al waer sij van roode goude
opdat ick u inder eewicheijt
met vreuchden mach aenschouwen.
Het is een alte grooten pijn
lief van lief gescheijden te sijn
daer lief moet lief ontbeeren
schenckt mij toch eender minnen strael
daer ick nu mach op teeren.
Soele wat wildij hebben meer
Ick heb u gegheven mij selven geheel
en al tot uwer baten
strijt altijt patientelijck
ick en sal u niet verlaten.
Ick heb geleden het is wel waer
ick street wel 33 jaer
al om des menschen leven
ick sterf voor u die bitter doot
al aen den crijs verheven.
O heer dat mackt mij goeden moet
nu orlof weirelt en al u goet
met allen u aenclijven
O Jhesus mijn alderliefste lief
U bruijt die wil ick blijven.
| |
[pagina 384]
| |
Een geestelijck liedeken op de wijse: ob den hock van deser straten daer wont een vrouken fijn.Die herderkens in den velden
die waren wakende: die waren wakende
in Jhesus virighe minne
soo waren sij blakende: soo waren sij blakende
nu weijt mijn schaepkens weijt weijt weijt
nu weijt mijn schaepkens weyt.
Ick sal mijn schapkens drijven
op eenen hooghen berch: op eenen
daer is soo soeten weijde
veeul soeter dan eenich merch: veeul
nu weijt mijn schapkens weijt: etc.
Wanneer dat schapken bletet
verliset eenen beet: verliset
het werter door onlustiger
het verliset sijnen eet: het verliset
nu weijt mijn schapkens weijt: etc.
Dan moeten sij daer passeren
door dat ootmoedich dal: door dat
daer moeten sij leeren duijcken
en stillekens swijghen al: en
nu weijt mijn schapkens weijt etc.
U willeken moet ghij derven
en gaen u selven ut: en gaen
een anders wille te doene
dat is soo goeden cruijt: dat is
nu weijt mijn schapkens weijt etc.
| |
[pagina 385]
| |
Nu bid ick alle mijn schapkens
dats neemt u selven waer: dats
weest hongerich al naeder deuch
volcht goedt exempel naer: volcht
nu weijt mijn schapkens weijt etc.
Als wij daer boven comen
al daer den herder is: al daer
dan sullen wij hem dancken en loven
en houden daer kermis: en houden
nu weijt mijn schapkens weijt etc.
Dan sal heer Jesus segghen
nu comt mijn soete bruijt: nu comt
comt weijt hier wt mijn sijde
dat soete goddelijck cruijt: dat soete
nu weijt mijn schapkens weijt etc.
| |
Een ander op de wijse: mijn oochskens weenen mijn herteken moet suchten.Bedroeft jonck herteken wat moetij lijden
die verloren heeft den soeten troost
betrout den heere tot allen tijden
ghij hebt hem soo menighen druppel bloets gecost.
Hij heeft u veeul meer eeren bewesen
boven die engelen van hemelrijck
al door sijn wondekens sijn wij genesen
ghedenckt o mensche wie dat ghij sijt
Het mach u al te luttel baten
al mochtet u costen vlees ende bloet
condij u selven hier niet gelaten
in druck in lijden in tegenspoet
| |
[pagina 386]
| |
En wilt u daer in niet bedroeven
want allen ons leven en is maer eenen strijt
het is u suete lief die u compt proeven
oft ghij altijt patientich sijt
Den vijant loopt van dage tot dage
om te verslinden dat godt bemient
hij doet dat herteken soo seer doercnagen
dat hij ten lesten seer mistroostich vint
Nu moeten wij den gheest vercloeken
soo schoonen blomkens wasschen als vergaen
des weirelts vrucht en wilt niet soecken
want Jhesus oochskens altijt op u staen.
Och wistij eens wat die hertekens lusten
die hier die weirelt gestorven sijn
in hun beghient die eewighe ruste
want langhe te leven is hun een pijn.
Nu stelt die weirelt al aen deen sijde
en wilt met Jhesus passeren gaen
heft op u cruijs hij sal u leijden
al daer die roode rooskens staen.
Die rooskens geven die vierige stralen
sij sijn versiert met Jhesus bloet
daer mach men alle sueticheijt wt halen
gelijck dat bieken wt den heunich doet
Jesus confort met u genade
vertroost die siele die naer u hackt
verlost dat herteken van alle qualen
dat daer int vier van uwer liefden blackt.
| |
[pagina 387]
| |
Den wech die is seer swaer om vinden
die daer ten eeuwigen leven leijt
maer die volstandich blijft al totten eijnde
die croone des levens is haer bereijt
Och lieve heer wiltse vertroosten
die daer in druck en in lijden sijn
deur u bitter doot wiltse verlossen
verandert dat water in soeten wijn.
| |
Noch een ander.Te Jherusalem woont mijn alderliefste heer
naer hem staet mijn begeeren
Jhesus is den name sijn
tot hem wil ick mij keeren.
Die weirelt moet gelaten sijn
de minne der creatueren
al ist mijn herteken dicwils pijn
ten sal altijt niet dueren.
Jhesus is ons voor geghaen
met allen sijn bitter lijden
willen wij van hem loon ontfaen
den selven wech moeten wij leijden
Die machdekens singhen eenen nieuwen sanck
sij dragen die croon alleijne
die niemants anders dragen sal
sij sijn van herten reijne.
Sij dragen die croone op haer hooft
sij sijn gecleet met witte cleeren
sij gaen aen heer Jhesus rechte hant
met alsoo grooter eeren.
| |
[pagina 388]
| |
Een gheestelijc liedeken op de wijse: te meij als alle die vogelen singen.Ter eeren van godt wil ick gaen strijden
natuerken wilt haer soo qualijc leijden
sij en wilt haer oock niet breken
och sal ick nu dit swaer verdriet
verdragen sonder wreken.
Nu gaet u cruijsken te gemoet
al vallet u swaer tsal noch worden goet
ende willet toch verdragen
hebdij niet liever een spijtich woert
dan namaels herten slagen.
Ties eer geseijt dant is gedaen
natuerken wilt haer soo qualijc versmaen
sij is veel liever gepresen
O heer dat lijden valt mij soo swaer
sult nummermeer anders wesen.
Haddij mij lief alsoot behoort
ghij en sout niet sijn soo haest gestoert
om alsoo cleijne saeke
ghij sout wel leeren u profijt
in alle dingen maken.
Die woordekens sijn seer goet om segghen
cost icke mij selven te vooren gelegghen
dat godt mij soo wilt proeven
soo en soude ick in geen tegenheijt
mij selven soo bedroeven.
En ben ick u dan niet soo veeul weert
dat ghij om mij te lijden begeert
Denckt hoe ick was te moede
als ick nackt aen den cruijce hinck
bedaut met mijnen blodte.
| |
[pagina 389]
| |
O heere geeft mij der minnen brant
mijn crancheijt is u wel bekent
ghij weet toch alle saeken
dat ick soo qualijck gelijden can
dat doet mij droefheijt maken.
Ghij hebt u selven veeulte lief
dat is het gene dat mij misnucht
in u mijn wtvercoren
heft op u cruijs en volcht mij na
en geeft den moet niet verloren.
O heere ick hebbe den wille soo goet
voorcomt mij met u gratie soet
op dat ick mach volbrengen
al is den wech seer enge en smal
ick salder mij deeur dringen.
O eedel ziele hebt goed betrouwen
al is den wech in deerste nauwe
ick sal u lijden stelpen
al hebbdij hier veeul tegenheijt
bidt godt ick sal u helpen.
O heere wie soude u liefde deurgronden
ick bid u deur u vijf bloedige wonden
dat ghij van mij wilt weeren
allet tgene dat u in mij mishaecht
dats alle mijn begheeren.
Mijn armkens sijn seer wijt ontdaen
compt alle tot mij die sijt belaen
ick en sal u niet versmaden
mijn roode bloet is al voor u
als ghij begeert genade.
| |
[pagina 390]
| |
Nu wil ick mijn lijden soo blijdelijck dragen
recht oft mijn lijden geen lijden en ware
ende sijn daer in verdulchdich
vorcomt mij met u gratie groot
ick ben toch lijden schuldich.
O Maria maget reijne
ghij sijt mijnen hope mijnen troest certeijne
want ghij troost soo genadich
tont mij dat ghij mijn moeder sijt
want ick ben toch misdadich.
| |
Een ander.Paciencie is soo goeden cruijt
het staet nu int sasoenen
want haer crachten en haer viertute
heeft ijegelijck wel vandoene
wilt u tot plucken spoeden
dat eedel cruijdeken soet
sluijtet binnen int herteken dijn
en denckt het sal eens beter sijn
sterckt in godt uwen (moet.)
En alle die pacientie behoeven
aldus suldijse saeijen
troosten den genen die sijn bedroeft
soo sal u godt oock paeijen
en helpen u wt de quaden
als gij in lijden sijt
want soo ghij uwen naesten doet
dat suldij vinden tsij quaet oft goet
voor godt gebenedijt.
| |
[pagina 391]
| |
Wildij pacincie crijgen saen
hoort toe ick salt ons leeren
ghij sultse dagelijcks plucken gaen
in bitter lijden ons heeren
wilt u herteken daer toe keeren
met traenkens wilt aensien
wat christus voor ons geleden heeft
hij is die pacincie int herteken gheeft
die geene die tot hem vliet.
En alle die onpasientich sijn
in dese droevige teijden
sij doen hen selven dobbel pijn
want jgelijck moet hem lijden
ten baet murmereren noch clagen
hout u in godt gerust
liet elck sijn sondich leven staen
den tijt die sou wel beteren saen
doerloge sou worden gheblust.
Die dit liedeken heeft ghedicht
veeul lijdens heeft sij verdragen
groot en cleijn van alle gewicht
tot in haer oude dagen
sij en wildens nimant clagen
dan godt diet beteren mach
de beste remedie diemen vint
dat is te peijsen ick hebt verdint
en dienen godt nacht en dach.
Finis.
| |
[pagina 392]
| |
Och herteken goet van wille
wilt inden heere hopen
en dracht u lijden stille
sijn gratie die staet open
hij sal uwen last verlichten
u lijden nemen af
al compt den vijant vichten
en achtes niet een caf.
Wilt moones toch versmaden
met allen sijn boose stricken
als hij compt valsheijt raden
en wilter niet op micken
maer loopt in Jesus wonden root
daer suldij wesen vrij
ghij sult daer smaken hemels broot
hij sal u beschermer sijn.
Compt u die weirelt vleijen
dinckt dat sij wel can lieghen
en laet u niet verleijen
want sij sou u bedrieghen
sij beloeft geluck en soeticheijt
solaes en alle vreucht
sij loont met alle bitterheijt
dus hout u aen die deucht.
Wilt u natuerken leeven
naer allen herten lusten
en willet haer niet toegeven
serteijn het moet wat costen
want sterven ende derven
verstaet die reden wel
die dat wel can verwerven
ten is gheen kinder spel.
| |
[pagina 393]
| |
Compt u natuerken clagen
seijt dat sij haer moet lijden
en wilt haer somtijts vragen
oft sij haer wilt verblijden
hier boven in dat hemelrijck
sij sal antwoorden Ja
soo moet sij strijden wettelijck
al gaget haer wat na.
Die reden sal u leeren
wat dat u staet te doene
en wilt van haer niet keeren
en sijt oock niet soo coene
dat ghij na volcht u sinnekens
al sonder goeden raet
mijn alder liefste minneken
daer af compt u alle quaet.
Die geest moet boven blijven
oft sou al qualijck lucken
men moet dat quaet quat verdrijven
den eijgen wille drucken
neempt geeren vanden wijsen raet
die dat deur comen sijn
Jesus moet sijn ons toeverlaet
nu en op elcke termijn.
Godt moet ons gratie geven
ons natuerken wet te d'wingen
diet eerst heeft gescreven
die mach wel mede singen
och cost sij eens beginnen
dat waer haer al te goet
sij bidt met goeder herten
looft toch den heere soet.
Finis.
(Slot volgt.)  |
|