Een devoot ende profitelyck boecxken

N^o. CCLVII.

Op die wise Hoort toe hoor toe ghi ruyters al gemeyne

Peeter van vuystenberghe om shoops vermeeren
Maecte dese leysen Maria ter eeren

1.
QVaet viandich saet/ boos obstinaet
Die Eua brochte in groot ghequel
Want haren raet/ maect desperaet
Adam brekende Gods beuel
Dies doe verwerf die doot seer stranck
Hy/ die onsterflijck is beseuen
Ende wi alte samen doer bedwanc
Moeten hier laten dleuen.
2.
Gods gramscap swaer/ vijf duysent iaer
Hielt den hemel ghesloten vast
Mer cort daer na een maecht voerwaer
Heeft ons ontsloten die grote last
Mids dat God sinen engel sant
Te Nazareth binnen der stede
Dair hi die suyuer maget vant
Alleene in eenichede.
3.
Aue sprac hy/ scoon maget ghi
Sijt nu vol gratien vercoren
Ontfaen suldy/ Gods sone vri
Die wort van v gheboren
Ic en bekende noyt gheenen man
Hoe soude dat moghen wesen?
Noch ooc en sal/ aldus mi dan
Verwondert seer van desen.
4.
O maechdelijc graen/ hoort mijn vermaen
Och bloeme bouen alle wiuen
Ghi sult ontfaen/ Gods sone saen
Ende suyuer maghet bliuen.
Die maget viel neder op haer knien
Al wt ootmoedic- || heyt reyne
Nae uwen woorden moet mi gheschien
Siet hier Gods deerne cleyne
5.
Op den kerstnacht/ was dese dracht
Gheboren alsoot God heeft voersien
Dies thelsce iacht doen bleef versmacht
Heer Iesus cause was van dyen
Ten achtsten dage reyn onbelet
So ons bewijst die scriftuere
Was hi besneden na doude wet.
Als God ende mensche puere
6.
Drie coningen reyn/ quamen int pleyn
Bi eender sterren schone
Om tgoddelijck greyn/ ende mensche certeyn
Te aenbeden in persone
Sij dancten Iesum menichfout
Te Nazareth bider steden
Ende gauen hem wierooc/ myrre/ ende gout
Met grooter weerdichede