Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op de selue wise1.
HAd ic vlogel als seraphin
Ic soude so hooghe vlieghen
Hier bouen inder eewicheyt
Tot heer Iesum Marien lieue.
2.
So soudick seggen heer vader mijn
Wanneer suldijt mi loonen
Dat ic v lange heb ghedient
Nu spant mi uwe croone
3.
Wat soudic v mijn crone spannen
Ghi sijt so edel so schoone
Want ghi die selue spieghel sijt
Daer ic mi in verthoone.
4.
Dat ic selue die spieghel ben
Dies mach ick mi verbliden
Men ciere ons dese verwaende bruyt
Ende settese neuen mijn side.
5.
Nu wel op goede seraphin
Ende oock Gods enghelen alle
Men ciere ons dese verwaende bruyt ||
Si is mi wel beuallen.
6.
Sij ghinghen daer inde camer
Sij souden die bruyt gaen chieren
Daer quam die heylige driuuldicheyt
Ende ghincse confirmeren
7.
Maria bracht een hemdeken wit
Dat was van siden cleyne
Het was haer suyuer reynicheyt
Dat bracht si haer alleyne.
8.
Die heylighe gheest bracht een sercoet
Dat was met goude besleghen
Die enghelen van hemelrijck
Die booghen haer ende neghen
9.
Die engel bracht haer eenen rock
Die was al sonder nade
Vrou bruyt draecht nu desen roc
Vanden seluen draecht v vader
10.
Si ginc voer sijn voeten staen
Si sach hem aen van minnen
Hi sprack haer also lieflijck aen
God groet v coninghinne
11.
Doen ons vrouwe ghenesen was
Ontrent der seste haluer weken
Doen leydemense ter kercken waert
Als ander vrouwen pleghen
12.
Twee duyfkens bracht si in haer hant
Ende een keersse clare
Dat was haer suuer reynicheyt
Die draechtse openbare
13.
Doe ons vrou inden tempel quam
Symeon quam haer teghen
Nu sie ic al dat ic begheere
Ic en ghere niet langer te leuen.
14.
Al dat is ende wesen mach
Heeft God in sijnder machte
| |
[pagina 249]
| |
Al sonder wee was hi gheboren
Ter couder middernachte
15.
O o o o gloria
Dat soetste vander minnen
Dat is heer Iesus Marien sone
God late ons hem ghewinnen.
|
|