Een devoot ende profitelyck boecxken

N^o. CLI.

ℂ Op die selue wise/ oft op Willeken de cuyper leyt gheuaen

1.
IC heb heer Ihesum wtuercoren
Hi heeft mi eerst bemint te voren
Ic en wils niet laten varen
Ick wilde hi mijn herte had ghewont
Met sijnder minnen strale
2.
Inder minnen boec staet ghescreuen
Hoe dieper ghewont/ hoe saechter ghenesen
Waer vore willen wi duchten
Die sijn nature ghesteruen can
Die crijcht so menige vruchten
3.
Sij crighen veel vruchten dat weten si wel
Die Iesum minnen die hebben goet spel.
Des werden si wel gheware
Als hi dat herte heeft gheraect
Dan quelen si der minnen quale
4.
Te quelen inder minnen vier
Dat is noch metten somigen dier
Wij moghen wel Gode louen
Ick hope dat beter wesen sal
Die begeerte gaet te bouen
5.
O here mocht ic v gheuen lof
Daer bouen in dat hemels hof
Na alle mijns herten wille
Mi dunct ic gaue v meerder lof
Dan alle die seraphinnen
6.
Die seraphinnen sijn hooghe verheuen
Brandende minne is alle haer leuen
Ick ligghe in dese allinden
O here alst uwen wille belieft.
Dan suldy mi wel ontbinden