Een devoot ende profitelyck boecxken

N^o. LXXVII.

ℂ Op die selue wise/ oft op Minen tijt gaet wech/ ende ick daer by.

1.
Sijn wij Gods creatueren ||
Tis recht dat wij labueren
Want quaet cruyt tot allen vren
Maect goede vruchten swaer
Dat sien wij openbaer
2.
So wie in sijn lant beuonde
Dat daer quaet cruyt in stonde
Die wortel totten gronde
Moet al wesen wt ghedaen
Sal daer goet cruyt inne staen
3.
Gods volck ende martelaren
Die hebben hier haer iaren
Ghearbeyt sonder sparen
Dat quaet cruyt wt ghetrocken
Dat goede voort ghebrocht.
4.
Moghen wi alle ten ende
Na pine ende swaer allende
Ontgaen die grote amende
Der godliker rechtuerdicheyt
So yst al wel ghearbeyt
5.
Daer ysser soe wi horen
Seer veel gheroepen voren
Maer weynich wtuercoren
Ter bruloft wel bereet
Na dat godlijcke secreet.
6.
Die quade cruden anmercken
Wilt dan met goede wercken
Eer si beghinnen te stercken
Haer belettende den ganck
In alle haer leuen lanck.
7.
Dit sal den arbeyt sochten
Hebt dit in v ghedochten
Die inden wijngaert wrochten
So vele die leste ontfinghen
Als die daer eerst in ghingen
8.
Die sijn lant wil besorghen
En beyde na gheenen morgen
Wie weet oft God sal borgen
Tot dat elck bekeert int goe
Elck sie in tijts wel toe
9.
Wilt al met wisen seden
Vwen tijt seer wel besteden
Eer ghi wort af ghesneden
Dat onder dat suyuer saet
Gheen oncruyt en staet
10.
Die suyuer herten blide
Sijn dat lant dat ick belide
Die God in allen tide
Bemint hier bouen al
Dat is/ ost wesen sal.
11.
Wij bidden alle ghemeene
Iesum van Nazareene
Dat hi ons tijt verleene.
Dat ons leuens termijn
Salich mach gheuonden sijn