Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxi. Capittel.

3. Den ghelucksalighen staet der goeden, 8. ende ellendighen der quaden na het oordeel, 10. beschrijuinghe der wtuerkoren Ierusalem der Bruyt des Lams.

A.1

ENde ick sach eenen ^a nieuwen Hemel, ende een nieuwe Aerde: want den eersten Hemel, ende de eerste Aerde was vergaen, ende de Zee en was niet meer.

a Esaie 65.b.17 ende 66.c.22 2.Petri 3.b.13

2

Ende ick Ioannes sach de ^b heylige Stadt dat nieuwe Ierusalem nederkomen van Gode wt den Hemel, bereydt ghelijck een bruyt die haren manne verciert is.

b Apocal 3.b.12 ende 21.b.10

3

Ende ick hoorde een groote stemme wt den Hemel segghen: ^c Siet, de Tabernakel Gods, met de menschen: ende hy sal met hen woonen, ende sy sullen zijn volck wesen, ende God selue met hen sal haer God wesen.

c Ezech. 43.a.7

4

^d Ende God sal alle tranen van hare ooghen afwasschen, ende de doot en sal niet meer wesen, noch droefheyt, noch gheschrey, noch pijne sal meer wesen: want dat eerste is wech ghegaen.

d Esaie 25.a.8 Apocal. 7.b.17

5

Ende die op den Throon sat, seyde: ^e Siet, ick maket al nieuw: ende hy seyde tot my, Schrijft: want dese woorden zijn warachtich ende ghetrouwe.

e Esaie 43.b.19 2.Corinth. 5.b.17

6

Ende hy seyde tot my: Het is gheschiet: ^f Ick ben de α ende ω [dat is] het Begin ende het Eynde. Ick sal den dorstighen gheuen wt de Fonteyne des leuendighen waters voor niet.

f Esaie 41.a.4 ende 44.a.6 Apoca. 1.a.8 ende 22.b.13

7

Wie ouerwint, die salt al besitten: ^g ende ick sal zijn God wesen, ende hy sal mijn sone wesen.

g Zacharie 8.a.8 Hebr. 8.b.10

8

Maer den vertzaechden, ende ongheloouigen, ende grouwelicken, ende moorders, ende hoereerders, ende, ^h toouenaers, ende Afgodendienaers, ende allen leughenaren, haer deel [is] in den bernenden Poel, met vyer ende sulphur: welck is de tweedde doot.

h Of, vergiftighers,

9

Ende een van de seuen Engelen, die de seuen phiolen hadden, vol met de seuen laetste plagen, quam tot my, ende sprack met my, segghende: Koemt, ick sal dy toonen de Bruyt, des Lams wijf.

B.10

Ende hy voerde my op inden gheest, op eenen grooten ende hooghen berch, ende hy toonde my ⁱ de groote Stadt, dat heylige Ierusalem, die wt den Hemel af quam van God,

i Hebre. 12.c.22 Apocal. 21.a.2

11

Ende hadde de eerlickheydt Gods: ende haer licht was ghelijck den aldercostelicksten steen, ghelijck den cristallinighen Iaspis steen.

12

Ende hadde eenen grooten hoogen muer met twaelf poorten, ende in de poorten, twaelf Enghelen, ende namen daer op gheschreuen, de welcke zijn der twaelf gheslachten der kinderen Israels.

13

Van Oosten dry poorten, van Noorden dry poorten, van Suyden dry poorten, van Westen dry poorten.

14

Ende de muer der Stadt ^k hadde twaelf fundamenten, ende daer in de namen der twaelf Apostelen des Lams.

k Ephes. 2.c.20

15

^l Ende die met my sprack, hadde een gouden

l Zacharie 2.a.1 Ezechiel. 40.a.3

[fol. 96v]

riet, om de Stadt te meten, ende hare poorten, ende haren muer.

16

Ende de Stadt lach vierkant, ende haer lengde was so groot als de breedde. Ende hy mat de Stadt ^m metten riete, op twaelf duysent, ⁿ stadien: ende hare lengde, ende breedde, ende hoochde zijn ghelijck.

m Griecx, in

n 8. Stadien zijn een Enghelsche of Italiaensche mijle, 24. stadien zijn een nederlantsche mijle van een vre gaens.

17

Ende hy mat harer muer hondert vier ende veertich cubiten, de mate eens menschen, de welcke des Enghels is.

18

Ende de timmeragie der muers was [van] Iaspis, ende de Stadt suyuer gout, ghelijck suyuer glas.

19

Ende de fundamenten des muers [waren] met alderhande kostelicke ghesteente verciert: Het eerste fundament [was] Iaspis: het tweedde Sapphyrus: het derde, Chalcedon: het vierde, Smaragdus:

C.20

Het vijfste Sardonix: het seste, Sardius: het seuende, Chrysolithus: het achtste, Beryllus: het neghende, Topasion: het thiende, Chrysoprasus: het elfste, Hyacinthus: het twaelfste, Amethystus.

21

Ende de twaelf poorten [waren] twaelf peerlen: een yeghelicke poorte was van een peerle: ende de ^o strate der Stadt [was] suyuer gout, gelijck doorluchtich glas.

o Of, marckt

22

Ende ick en sach in haer gheenen Tempel, want de Heere God almachtich is haer Tempel, ende het Lam.

23

^p Ende de Stadt behoeft der Sonne noch der Mane niet, dat sy daer in schijnen: want de klaerheyt Gods heeftse verlicht, ende haer keersse [is] het Lam.

p Esaie 60.b.19 Zacharie 14.a.7 Apocal. 22.a.5

24

^q Ende de volcken die salich zijn gheworden, sullen in haer licht wandelen, ende de Koningen der Aerden sullen hare eerlickheydt ende eere in haer brenghen.

q Esaie 60.a.3

25

Ende hare poorten en sullen niet gesloten worden des daechs: want daer en sal geenen nacht wesen.

26

Ende de eerlickheyt ende eere der Heydenen sal in haer ghebracht worden.

27

Ende in haer en sal niet komen dat ontreynicht ofte grouwelicheyt doet, of leugen [spreect:] maer die gheschreuen zijn ^r inden Boeck des leuens des Lams.

r Exodi 32.d.32 Psalm. 69.c.29 Philippen. 4.a.3 Apoca. 3.a.5 ende 20.b.12