Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. De Duyuel eenen tijdt lanck ghebonden gheweest hebbende, ende daerna weder ontbonden zijnde, quelt de Ghemeynte seer, 9. na het oordeel aller menschen wort hy met den synen gheworpen in den poel des vyers.

A.1

ENde ick sach eenen Enghel wt den Hemel neder komen, ende hy hadde den sleutel des Afgronts, ende een groote keten in zijn hant.

2

^a Ende hy heeft gegrepen den Draeck die oude Slange, de welcke is de Duyuel ende Satanas, ende heeft hem ghebonden duysent iaren.

a 2.Petri 2.a.4 Apocal. 12.a.9

3

Ende heeft hem inden Afgront gheworpen, ende heeft hem ghesloten, ende heeft verseghelt ouer hem, om dat hy de volcken niet meer verleyden soude, tot dat de duysent iaren voleyndt waren: ende daer na moet hy eenen kleynen tijdt ontbonden worden.

4

Ende ick sach throonen, ende sy saten daer op, ende hen werdt het oordeel ghegheuen: ende de zielen der ghener die onthooft waren omme het ghetuygenisse Iesu, ende omme het woort Gods, ende die de Beeste noch haer beelt niet aenghebeden en hadden, ende hadden het merckteecken niet ontfanghen aen haer voorhooft, noch aen haer rechter hant, ende sy leefden ende regneerden met Christo duysent iaren.

5

Maer de ander doode en werden niet weder leuendich, tot dat de duysent iaren voleynt werden. Dit is de eerste opstandinghe.

6

Salich ende heylich [is hy] die deel heeft in de eerste opstandinghe: In desen heeft de tweedde doot geen macht: maer sy sullen wesen ^b Priesters Gods ende Christi, ende sy sullen met hem regneeren duysent iaren.

b 1.Petri 2.a.5 Apocal. 1.a.6 ende 5.b.10

7

Ende als de duysent iaren sullen voleynt wesen, sal de Satan wt syne gheuanckenisse ontbonden worden:

8

Ende hy sal wtgaen om de volcken te verleyden die in de vier hoecken der Aerden zijn, ^c den Goch ende den Magoch, om hem te versamelen ten strijde, der welcker ghetal is als het zant der Zee.

c Ezech. 38.a.2

9

Ende zijn opghekomen in de breedde der Aerden, ende hebben den heyrlegher der Heylighen ommeringt, ende de beminde Stadt: ende daer quam vyer neder van Gode wt den Hemel, ende verteerdese.

B.10

Ende de Duyuel diese verleydde: ^d wert gheworpen in den Poel des vyers ende sulphurs, daer de Beeste ende de valsche Propheet sullen gepijnicht worden dach ende nacht van eewicheyt tot eewicheyt.

d Apocal. 19.c.20 Danielis 7.b.11

11

Ende ick sach eenen grooten witten Throon, ende die daer op gheseten was, van wiens aensichte de Aerde, ende de Hemel vloot, ende daer en is gheen plaetse voor hen gheuonden.

12

Ende ick sach de doode, kleyn ende groot staen voor God: ende de boecken waren gheopent, ende daer was een ander Boeck gheopent ^e die des leuens is: ende de doode werden geoordeelt wt het ghene dat in die boecken gheschreuen was ^f na hare wercken.

e Exodi 32.d.32 Psalm. 69.c.29 Philippen. 4.a.3 Apoca. 3.a.5 ende 21.c.27

f Psalm. 62.b.13 Ieremie 17.b.10 ende 32.b.19 Matthei 16.c.27 Roman. 2.a.6 ende 14.b.12 2.Corinth. 5.b.10 Galat. 6.a.5 Apocal. 2.c.23

13

Ende de Zee gaf de dooden die in haer waren, ende de Doot ende de Helle gaf de dooden die in haer waren: ende sy weren gheoordeelt een yeghelick na syne wercken.

14

Ende de Doot, ende de Helle, werden inden Poel des vyers gheworpen. (Dit is de tweedde doot.)

15

Ende so wie niet gheuonden en was in den Boeck des leuens gheschreuen, die werdt in den Poel des vyers gheworpen.