Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xix. Capittel.

1. Grooten lof ende danc des Hemelschen geselschaps, voor de straffe der hoere ende aller verleyders ende boosdoenders, ende voor de bruyloft des Lams, ende de ouerwinninghe des woorts Gods, 10. de Enghel weygert aenghebeden te zijn van Ioanne.

A.1

ENde na desen hoorde ick een groote stemme eener grooter scharen in den Hemel segghen: ^a Halleluia, de salicheydt, ende lof, ende eere, ende macht, [is] onses Heeren Gods.

a Dat is, Loeft den Heere,

2

^b Want syne oordeelen zijn warachtich ende rechtueerdich, want hy heeft de groote hoere die de Aerde met hare hoererie verdoruen heeft, verdoemt, ende hy heeft het bloet syner Dienaren van hare hant ghewroken.

b 4.Esdre 15.c.21 Apocal. 6.b.10

3

Ende sy seyden wederom, Halleluia: ^c ende haren roock ghinck op van eewicheydt tot eewicheydt.

c Apocal. 9.a.2 ende 14.b.11

4

Ende de vier ende twintich Ouderlinghen, ende de vier dieren vielen neder, ende aenbaden God die op den Throon sat, segghende: Amen, Halleluia.

5

Ende daer quam een stemme wt den Throon, seggende: Loeft onsen God ghy syne Dienstknechten, ende die hem vreest, beyde kleyn ende groot.

6

Ende ick hoorde als een gheluyt eener grooter scharen, ende als een gheluyt veler wateren, ende als een gheluyt stercker donderslaghen, segghende: Halleluia, want de Heere God almachtich regneert.

7

Laet ons blijde ende vrolick zijn, ende hem eere gheuen, want de bruyloft des Lams is ghekomen, ende zijn Wijf heeft haerseluen bereyt.

8

Ende haer is ghegheuen dat sy bekleedt worde met reynen ende blinckenden fijnen lijnwade: Want dat fijn lijnwaedt, zijn de rechtuerdichmakinghen der Heylighen.

9

Ende hy seyde tot my: Schrijft: ^d Salich zijn de ghene die totten Auontmale der Bruyloft des Lams geroepen zijn. Ende hy seyde my: Dit zijn warachtighe woorden Gods.

d Matthei 22.a.2 Luce 14.b.16

B.10

Ende ick viel voor syne voeten om hem te aenbidden: ende hy seyde tot my: ^e Siet dat du dat niet en doest: ick ben dijn mededienstknecht ende dyner broederen die het ghetuyghenisse Iesu hebben: Aenbidt God: want de gheest der Prophecien is het ghetuyghenisse Iesu.

e Actuum 10.c.26 ende 14.b.14 Apocal. 22.a.9

11

Ende ick sach den Hemel open, ende siet, een wit peert, ende die daer op sat, was ghenaemt: Ghetrouwe ende warachtich, ende hy oordeelt ende krijcht in rechtueerdicheyt.

12

^f Ende syne ooghen [waren] als de vlamme des vyers, ende op zijn hooft vele kroonen, ende hadde eenen naem gheschreuen dien niemant en weet dan hy.

f Apocal. 1.b.14

13

^g Ende was bekleedt met eenen kleede, dat met bloet gheuerwet was, ende zijn naem hiet: Dat woort Gods.

g Esaie 63.a.2

14

Ende de heyrkrachten inden Hemel volchden hem na op witte peerden, bekleedt met wit reyn fijn lijnwaet.

15

^h Ende wt synen mont ginck een scherp sweert: om dat hy daer mede de volcken slaen soude, ⁱ ende hy salse hoeden met een ijseren roede, ende hy treedt de persse des wijns der verbolgentheyt ende toornicheyt Gods Almachtich:

h Esaie 49.a.2 Ephes. 6.b.17 Hebr. 4.b.12 Apocal. 1.b.16 ende 2.b.16

i Psalm. 2.a.9

16

Ende hy heeft op zijn kleet ende op zijn heupe eenen naem gheschreuen: ^k Koninck der Koninghen, ende Heere der heeren.

k 1.Timot. 6.b.15 Apocal. 17.b.14

17

Ende ick sach eenen Engel in de Sonne staen, ende riep met grooter stemme, seggende tot alle de voghelen die midden inden Hemel vloghen: Koemt ende wort vergadert ten Auontmale des grooten Gods:

18

Op dat ghy eet het vleesch der Koninghen, ende het vleesch der hooftmannen, ende het vleesch der stercken, ende het vleesch der peerden, ende der genen die daer op sitten, ende het vleesch aller vrijen ende dienstbaren, der kleynen ende grooten:

[fol. 96r]

19

Ende ick sach de Beeste ende de Koningen der Aerden, ende hare heyrkrachten vergadert om te krijghen tegen hem die op het peert sat, ende teghen syne heyrkracht.

C.20

Ende de Beeste wert gheuangen, ende met haer de valsche Propheet ^l die de teeckenen voor haer gedaen hadde, ^m door de welcke sy verleydt waren die het merckteecken der Beeste ontfanghen hadden, ende die haer beelt aenbaden:

l Apocal. 13.b.13 Deut. 13.a.1 Matth. 24.c.24 Apocal. 16.b.14

m Griecx, in

21

ⁿ Leuende zijn dese twee geworpen in den bernenden poel des vyers met sulphur.

n Apocal. 20.b.10 Danielis 7.b.11

22

Ende de ander werden ghedoot metten sweerde des ghenen die op het peert sat, het welcke wt synen mont ghinck, ende alle de voghelen werden versaedt van haren vleessche.