Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xviij. Capittel.

2. Den val der hoere van Babylon, droeuich voor den boosen, vrolick voor den goeden, 4. vermaninghe tot het volck Gods dat sy daer wt gaen.

A.1

ENde na desen sach ick eenen anderen Enghel wt den Hemel af komen, hebbende groote macht, ende de Aerde is luchtich gheworden van syne klaerheyt,

2

Ende riep wt krachtelick, met luyder stemme, segghende: ^a Sy is gheuallen, sy is gheuallen die groote Babylon, ende is gheworden een wooninghe der Duyuelen, ende bewarenisse aller onreyner geesten, ende bewarenisse aller onreyner ende hatelicker voghelen.

a Apocal. 14.a.8 Esaie 21.a.9 Ieremie 51.a.8

3

Want van de wijne des toorens haerder hoererie hebben alle volcken ghedroncken, ^b ende de Koningen der Aerden hebben met haer ghehoereert: ende de kooplieden op Aerden, zijn van de macht haerder weelde rijck gheworden.

b Apocal. 17.a.2

4

Ende ick hoorde een ander stemme wt den Hemel, seggen: ^c Gaet wt van haer mijn volck, op dat ghy haerer sonden niet deelachtich en zijt, op dat ghy niet van hare plaghen en ontfangt.

c Esaie 52.b.11 2.Corint. 6.b.17 Gene. 19.b.12

5

Want hare sonden zijn totten Hemel toe ^d gekomen, ende God is haerder ongherechticheden ghedachtich gheworden.

d Of, ghehoopt,

6

Verghelt haer, ghelijck sy oock v vergolden heeft, ende dobbelt haer dobbel na hare wercken. In den Drinckbeker daer sy v in ^e geschoncken heeft, ^f schenckt haer dobbel.

e Griecx, gemengt

f Griecx, menget

7

So vele als sy haerseluen vereerlickt heeft, ende weeldich geweest is, so vele pijnen ende droefheyt gheeft haer: want sy seyt in haer herte: ^g Ick sitte, [ende ben] Koninginne, ende ben gheen weduwe, ende en sal gheen droefheyt sien.

g Esaie 47.a.8

8

^h Hierom sullen hare plagen op eenen dach komen, doot, droefheyt, hongher: ende sal int vyer verbrant worden: want de Heere God diese oordeelt, is sterck.

h Danielis 8.b.19 2.Thessal. 2.a.8 Esaie 11.a.4

9

Ende ⁱ de Koningen der Aerden die met haer ghehoereert ende weeldich geweest hebben, sullense beweenen ende rouwe ouer haer maken, als sy den roock haers brants sullen sien:

i Apocal. 17.a.2 ende 18.a.3

B.10

Van verre staende, van vreese haerder pijne, ende segghende: ^k Wee, wee, de groote Stadt Baby-

k Esaie 21.a.9 Ieremie 51.a.8 Apocal. 14.a.8

[fol. 95v]

lon die stercke Stadt, want dijn oordeel is te eener vre ghekomen.

11

Ende de Kooplieden op Aerden sullen weenen ende rouwe draghen ouer haer, want haer koopmanschap en koopt niemant meer.

12

Koopmanschap van gout, ende siluer, ende kostelicke steenen, ende peerlen, ende fijn lijnwaet, ende purpuren, ende zijde, ende scharlaken, ende alderhande thyinen hout, ende alle yuoren vaten, ende alle vaten van den kostelicsten houte, ende koper, ende ijser, ende marmer:

13

Ende kanneel, ende reuckwerck, ende salue, ende wieroock, ende wijn, ende olye, ende meelbloeme, ende tarwe, ende beesten, ende schapen: ende [koopmanschap] van peerden ende van waghenen, ende van lichamen, ende zielen der menschen.

14

Ende de ^l vruchten der begheerlickheyt dyner ziele, zijn van dy wech ghegaen, ende al dat vette ende klare, is van dy wech ghegaen: ende du salt niet meer de selue beuonden worden.

l Of, het, oof, Dat is, de boomurucht

15

De Kooplieden deser dinghen die van haer rijcke gheworden zijn, sullen om de vreese haerder pijne van verre staen, weenende, ende droeue wesende:

16

Ende segghende: Wee, wee, die groote Stadt, die bekleedt was met fijnen lijnwade, ende purpur, ende rosenverwe, ende vergult met goude ende kostelicke steenen, ende peerlen:

17

Want in een vre is sulcke rijckdom woest geworden. Ende alle stiermans, ende alle het volck op de schepen, ende de Schiplieden, ende alle die de Zee hanteeren, sullen van verre staen:

18

Ende sullen roepen, siende den roock haers brants, ende sullen seggen: Wat [Sadt was] deser grooter Stadt ghelijck?

19

Ende sy sullen asschen op hare hoofden worpen, ende roepen weenende ende segghende: Wee, wee, die groote Stadt, in de welcke alle die schepen in der Zee hadden, van hare kostelickheydt rijcke gheworden zijn, want in een vre is sy verwoest.

C.20

Weest vrolick ouer haer du Hemel, ende ghy heylige Apostelen ende Propheten, want God heeft ^m uwe oordeel gheoordeelt van haer.

m Of, heeft wrake van haer ghenomen om uwent wille.

21

Ende een sterck Enghel heeft eenen steen opgheheuen als eenen grooten Molensteen, ende heeft dien in de Zee geworpen, seggende: ⁿ Also sal de groote Stadt Babylon met eenen storm gheworpen worden, ende en sal niet meer gheuonden worden.

n Ieremie 51.a.8

22

^o Ende de stemme der Harpenspeelders, ende Sanghers, ende Fluyters, ende Basuyners, en sal niet meer in dy ghehoort worden, ende gheen Konstenaer van eenighe konste en sal meer in dy geuonden worden, ende het gheluyt der molen en en sal in dy niet meer gheuonden worden:

o Ieremie 25.b.10

23

Ende het licht der keerssen sal in dy niet meer schijnen: ^p ende de stemme des Bruydegoms ende Bruyts en sal in dy niet meer ghehoort worden, want dyne Kooplieden waren de Vorsten op Aerden, want in dyne ^q toouerien zijn alle volcken verleydt gheweest.

p Ieremie 16.a.9

q Of, vergiftinghe

24

Ende in haer is gheuonden het bloet der Propheten ende Heylighen, ende aller der gener die ghedoot zijn opter Aerden.