Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Beschrijuinghe der grooter hoere, hare grouwelicheyt ende straffe. 14. de ouerwinninghe des Lams.

A.1

ENde een van de seuen Enghelen die de seuen Phiolen hadden, quam ende sprack met my, segghende tot my: Koemt, ick sal dy toonen het oordeel der grooter hoeren die op vele wateren sit:

2

^a Met de welcke de Koninghen der Aerden gehoereert hebben, ende de inwoonders der Aerden zijn droncken geworden vanden wijne haerder hoererie.

a Apocal. 18.a.3

3

Ende hy brachte my wech in den gheest in een woestijne, ende ick sach een vrouwe sitten op een roosuerwighe Beeste vol namen der lasteringe, ende hadde seuen hoofden ende thien hoornen.

4

Ende de vrouwe was bekleedt met purpuren ende roosenuerwe, ende vergult met goude, ende kostelicke steenen, ende peerlen: ende hadde in hare hant eenen gouden Drinckbeker vol grouwelickheden ende onreynicheden haerder hoererie:

5

Ende op haer voorhooft eenen naem geschreuen: Verborghentheyt, de groote Babylon, moeder der hoererien ende grouwelickheden der Aerde.

6

Ende ick sach die vrouwe dat sy droncken was van den bloede der Heyligen, ende vanden bloede der ^b Getuygen Iesu: ende ick was verwondert met groote verwonderinghe doe ickse sach.

b Of, Martelaren

7

Ende de Enghel seyde my: Waerom bistu verwondert? Ick sal dy segghen de verborgentheyt der vrouwen, ende der Beeste, diese draecht, welcke seuen hoofden heeft, ende thien hoornen.

8

De Beeste die du ghesien hebst, was, ende is niet, ende sal vanden afgront opkomen, ende gaet ter verderuinge, ende die opter Aerden woonen, ( ^c wiens namen niet gheschreuen en zijn in den Boeck des leuens, vanden beginne der werelt,) sullen verwonderen als sy die Beeste sien sullen, die was, ende niet en is, hoewel sy is.

c Apocal. 13.a.8

9

Hier is den sin, die wijsheydt heeft: ^d De seuen hoofden zijn seuen berghen daer de vrouwe op sit, ende zijn seuen Koninghen:

d Apocal. 13.a.1

B.10

De vijue zijn gheuallen, ende de een is, ende de ander en is noch niet ghekomen, ende als hy sal ghekomen zijn, moet hy een weynich blijuen.

11

Ende de Beeste die was: ende niet en is, die is oock de achtste [Koninck,] ende is van de seuen, ende gaet ter verderuinghe.

12

^e Ende de thien hoornen die du ghesien hebst, zijn thien Koningen, die het Koninckrijcke noch niet ontfanghen en hebben, maer ontfanghen macht als Koningen te eener vren metter Beeste.

e Danielis 7.c.20 Apocal. 13.a.1

13

Dese hebben eenen raedt, ende sullen hare kracht ende macht der Beeste gheuen.

14

Dese sullen teghen het Lam krijgen, ende het Lam salse ouerwinnen: ^f want het is de Heere der heeren, ende Koninck der Koninghen, ende de gheroepene ende wtuerkorene gheloouighe die met hem zijn.

f 1.Timot. 6.b.15 Apocal. 19.b.16

15

Ende hy seyde tot my: ^g De wateren die du ghesien hebst daer de hoere sit, zijn volcken ende scharen ende nacien, ende talen.

g Esaie 8.a.7

16

Ende de thien hoornen die du ghesien hebst aen de Beeste, die sullen de hoere haten, ende sullense woeste maken, ende naect, ende sullen haer vleesch eten, ende sullense met vyer verbranden.

17

Want God heeft hen in hare herten ghegheuen te doen dat hem behaecht, ende eenerley raedt te doen, ende haer Koninckrijcke der Beeste te gheuen, tot dat de woorden Gods voleynt zijn.

18

Ende de vrouwe die du ghesien hebst, is de groote Stadt, die het Konincrijcke heeft ouer de Koninghen der Aerden.