Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Uan de Phiolen hier ende daer wtghestort door de Enghelen, ende wat plaghen daer na volgen, 15. Waerschuwinghe datmen moet toesien voor hemseluen.

A.1

ENde ick hoorde een groote stemme wt den Tempel segghen tot de seuen Enghelen: Gaet, ghiet de seuen Phiolen der toornicheyt Gods wt op de Aerde.

2

Ende de eerste is wtghegaen, ende heeft zijn Phiole wtghegoten op de Aerde, ende daer is ghekomen een quade boose sweere op de menschen, die het merckteecken der Beeste hadden, ende die haer beelt aenbaden.

3

Ende de tweedde Enghel heeft zijn Phiole wtghegoten in de Zee, ende is gheworden als bloet eens dooden lichaems, ende alle leuendige ziele is ghestoruen in de Zee.

4

Ende de derde Enghel heeft zijn Phiole wtghegoten in de waterstroomen, ende in de fonteynen, ende sy zijn bloet gheworden.

5

Ende ick hoorde den Engel der wateren segghen: Du bist rechtueerdich Heere, die Is, ende die Was, ende heylich, om dat du dit geoordeelt hebst.

6

^a Want sy hebben het bloet der Heylighen ende Propheten wtghestort, ende du hebst hen bloet te drincken ghegheuen: want sy zijnt weerdich.

a Matthei 23.d.34

7

Ende ick hoorde eenen anderen van den Altaer seggen: Ia Heere God almachtich, dyne oordeelen zijn warachtich ende rechtueerdich.

8

Ende de vierde Enghel heeft zijn Phiole wtghegoten in de Sonne, ende haer is ghegheuen de menschen te quellen met hitte ^b door vyer.

b Griecx, in

9

Ende de menschen brandden met grooter hitte, ende sy lasterden den naem Gods die de macht hadde ouer dese plagen, ende bekeerden hen niet om hem eere te gheuen.

B.10

Ende de vijfste Enghel heeft zijn Phiole wtghegoten op den Throon der Beeste, ende haer rijcke is verduystert gheworden, ende sy knauden hare tonghen van smerte:

11

Ende sy lasterden den God des Hemels van hare smerten ende van hare sweeren, ende sy bekeerden hen niet van hare wercken.

12

Ende de seste Enghel heeft zijn Phiole wtgegoten op den groote waterstroom Euphratem, ende zijn water is wtghedroocht, om dat bereyt soude worden de wech der Koninghen van den opganck der Sonnen.

13

Ende ich sach wt den mont der Draken, ende wt den mont der Beeste, ende wt den mont des valschen Propheets, dry onreyne geesten [gaen] ghelijck vorsschen:

14

^c Want sy zijn gheesten der Duyuelen, ende doen teeckenen, om te gaen tot de Koningen der

c 2.Thess. 2.a.9 Apocal. 13.b.14 ende 19.c.20.

[fol. 95r]

Aerden ende der gheheelder werelt, om hen te vergaderen totten krijch diens grooten daechs Gods almachtich.

15

^d Siet, ick kome als een dief: Salich [is hy] die waeckt ^e ende syne kleederen bewaert, op dat hy niet naect en wandele, ende zijn schande niet ghesien en worde.

d Matt. 24.e.44 Luce 12.e.40 1.Thessal. 5.a.6 2.Petri 3.b.10. Apoca. 3.a.3

e 2.Corint. 5.a.3 Apocal. 3.b.18

16

Ende sy vergaderdense in een plaetse, genaemt int Hebreische Armageddon.

17

Ende de seuende Engel heeft zijn Phiole wtghegoten in de lucht, ende daer quam een groote stemme wt den Tempel des Hemels van den Throon, segghende: Het is gheschiet.

18

Ende daer zijn stemmen ende donderslaghen, ende blixemen gheschiedt, ende daer is groote Aertbeuinghe gheschiet, sulck als niet gheschiedt en is van dat de menschen op de Aerde gheweest zijn, sodanighe Aertbeuinghe so groot.

19

Ende de groote Stadt is in dry deelen ghescheurt, ende de steden der Heydenen zijn gheuallen: ende de groote Babylon is voor God in ghedachtenisse ghekomen, ^f om haer te gheuen de Drinckbeker des wijns der verbolgentheyt zijns toorens.

f Ieremie 25.b.15

C.20

Ende alle eylanden zijn geuloden, ende de berghen en zijn niet gheuonden.

21

Ende daer is grooten hagel als van een pont gheuallen van den Hemel op de menschen: ende de menschen lasterden God om der plaghe des haghels, want syne plaghe was seer groot.