Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. Uan de seuen Enghelen die de seuen laetste plagen hebben, 3. den sanck der ouerwinners der Beeste, 7. Uan de seuen Phiolen der toornicheyt Gods.

A.1

ENde ick sach een ander groot ende wonderlick teecken inden Hemel, seuen Enghelen hebbende die seuen laetste plagen, want ^a met dese is de toornicheydt Gods voleyndt.

a Griecx, in

2

Ende ick sach als ^b een glasen Zee ghemengt met vyer, ende die ouerwinners waren van der Beeste ende van haer Beelt, ende van haer merckteecken, ende van den ghetale haers naems, dat sy stonden aen de glasen Zee hebbende harpen Gods.

b Apocal. 4.a.6

3

Ende songhen den sanck Mosis des Dienstknechts Gods, ende den sanck des Lams, seggende: Dyne wercken zijn groot ende wonderlick Heere God almachtich: dyne wegen zijn ^c rechtueerdich ende warachtich Koninck der Heylighen.

c Psalm. 145.b.17

4

^d Wie sal dy niet vreesen, Heere, ende dynen naem prijsen? Want du [bist] alleen heylich, want alle Heydenen sullen komen ende voor dy aenbidden: want dyne oordeelen zijn openbaer gheworden.

d Ieremie 10.a.7

5

Ende na desen sach ick, ende siet, de Tempel des Tabernakels der ghetuyghenisse in den Hemel, wert gheopent.

6

Ende de seuen Enghelen hebbende de seuen plaghen, quamen wt den Tempel, bekleedt met reynen ende klaren lijnwade, ende omme de borsten ommegort met gouden gordelen.

7

Ende een van der vier dieren gaf den seuen Enghelen seuen gouden Phiolen vol der toornicheydt Gods, die leeft van eewicheydt tot eewicheydt.

8

^e Ende de Tempel wert veruult van den roock wt de eerlickheydt Gods, ende wt syne macht, ende niemant en konde inden Tempel gaen, tot dat de seuen plaghen der seuen Enghelen voleyndt waren.

e Ezech. 44.a.4