Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Het schoon gheselschap des Lams, 6. een Enghel verkondicht het Euangelium, 8. een ander den val van Babylon, 9. de derde, datmen vliede vander Beeste, 13. het gheluck der gener die inden Heere steruen, 15. vanden Oogst ende Wijntijt des Heeren.

A.1

ENde ick sach, ende siet, het Lam stont op den berch Sion, ende met hem hondert vier ende veertich duysent die den naem zijns Vaders hadden op haer voorhoofden ^a† geschreuen.

a† Anders, brandende.

2

Ende ick hoorde een stemme wt den Hemel ghelijck een stemme veler wateren, ende gelijck een stemme eens grooten donderslaechs: ende ick hoorde een stemme van Harpenspeelders, die op harpen speelden,

3

Ende songen als eenen nieuwen sanck voor den Throon, ende voor de vier dieren, ende de Ouderlingen: ende niemant en konde den sanck leeren, dan die hondert vier ende veertich duysent, [namelick,] die vander Aerden ghekocht waren.

4

Dese zijn die met vrouwen niet beuleckt en zijn, ^b want sy zijn maechden: dese volghen het Lam waer het gaet. Dese zijn ghekocht van de menschen, eerstelingen Gode ende den Lamme:

b 2.Corint. 11.a.2

5

Ende in haren mont en is gheen bedroch geuonden: want sy zijn onstraffelick voor den Throon Gods.

6

Ende ick sach eenen anderen Enghel vliegen midden inden Hemel, ende hy hadde een eewich Euangelium om den inwoonders der Aerden te verkondighen, ende allen nacien ende geslachten, ende tonghen, ende volcken,

7

Segghende met luyder stemme: Vreest God, ende gheeft hem eerlickheyt, want de vre zijns oordeels is gekomen: ende aenbidt hem ^c die den Hemel ende de Aerde ghemaeckt heeft, ende de Zee, ende de waterfonteynen.

c Gene. 1.a.1. Psalm. 33.a.6 ende 124.a.8 ende 146.a.6 Actuum 14.b.15 ende 17.c.24

8

Ende daer is een ander Enghel geuolcht, segghende: ^d Sy is gheuallen, sy is gheuallen, Babylon die groote Stadt, om dat sy wt den wijn

d Apocal. 18.a.2 Esaie 21.a.9 Ieremie 51.a.8

[fol. 94v]

des toorens haerder hoererie allen volcken te drincken ghegheuen heeft.

9

Ende de derde Enghel is hen gheuolcht. segghende met luyder stemme: Ist dat yemandt de Beeste aenbidt ende haer beelt, ende een merckteecken neemt op zijn voorhooft, of op zijn rechter hant:

B.10

Die sal oock drincken vanden wijn des toorens Gods, vanden louteren wijne gheschoncken inden Drinckbeker zijns toorens: ende sal ghepijnicht worden met vyer ende sulphur voor de heylighe Enghelen, ende voor het Lam:

11

^e Ende de roock haerder pijninge sal opgaen van eewicheyt tot eewicheydt, ende sy en sullen gheen ruste hebben dach ende nacht, die de Beeste ende haer beelt aenbidden, ende ist dat yemant het merckteecken haers naems ontfangt.

e Apocal. 9.a.2 ende 19.a.3

12

^f Hier is de lijdsaemheyt der Heylighen, hier zijn die de gheboden Gods houden, ende het gelooue Iesu.

f Apocal. 13.b.10

13

Ende ick hoorde een stemme wt den Hemel tot my segghen: Schrijft, Salich zijn de dooden die ^g in den Heere steruen: de Gheest seyt: ^h dat sy rusten van haren arbeydt, ende hare wercken volghen hen na.

g Of, om des Heeren wil:

h Of, om dat

14

Ende ick sach, ende siet, een witte wolcke, ende op de wolcke, sat een die eens menschen sone ghelijck was, hebbende op zijn hooft een gouden kroone, ende in syne hant een scherpe sickel.

15

Ende daer is ghekomen een ander Enghel wt den Tempel, roepende met luyder stemmen tot hem die op de wolcke sat: ⁱ Sendt dijn sickel, ende maeyt, want de vre om te maeyen is dy gekomen: want den Oogst der Aerden is dorre geworden.

i Ioel 3.b.13 Matthei 13.d.39

16

Ende die op de wolcke sat, sandt zijn sickel op de Aerde, ende de Aerde wert ghemaeyt.

17

Ende een ander Enghel quam wt den Tempel die inden Hemel was, ende hadde oock een scherpe sickel.

18

Ende daer quam een ander Enghel vanden Altaer, die macht hadde ouer het vyer, ende riep met luyder stemme tot hem die de scherpe sickel hadde, segghende: Sendt dijn scherpe sickel ende snijt de druyftacken der Aerden: want hare druyuen zijn rijpe.

19

Ende de Enghel sandt zijn sickel op der Aerden, ende sneedt den wijngaert der Aerden, ende wierpse in de groote persse der toorns Gods.

20

Ende de persse werdt buyten de stadt ghetreden, ende het bloet is gekomen wt de persse, tot de toomen der peerden, duysent ses hondert stadien verre.