Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. Uan de beeste die alle de verworpene verleydt, 11. beuesticht door een ander beeste.

A.1

ENde ick sach vander Zee een beeste op komen, ^a de welcke hadde seuen hoofden, ende thien hoornen: ende op hare hoornen thien kroonen: ende op hare hoofden eenen ^b lasterlicken naem.

a Apo. 17.a.9.b.12 Danielis 7.c.20

b Griecx, naem der lasteringhe

2

Ende de beeste die ick sach, was ghelijck een pardel, ende hare voeten als eens beyrs voeten, ende haren muyl als de muyl eens Leeuws, ende de Draec gaf haer zijn macht, ende synen throon, ende groote moghentheyt.

3

Ende ick sach een van hare hoofden als ter doot gheslaghen, ende syne doodelicke wonde wert ghenesen: ende geheel Aertrijck is verwonderende de beeste gheuolcht.

4

Ende sy hebben den Draeck aenghebeden die der Beeste macht ghegeuen hadde, ende sy hebben de Beeste aenghebeden, segghende: Wie is gelijck dese Beeste? Wie kan met haer krijgen?

5

Ende haer is eenen mont gegeuen om groote dinghen ende lasteringhen te spreken: ende haer is macht ghegheuen te doen twee ende veertich maenden.

6

Ende sy dede haren mont open om lasteringhen te spreken teghen God, om synen naem ende syne woonstede te lasteren, ende de ghene die inden Hemel woonen.

7

^c Ende haer is ghegheuen krijch te voeren teghen de Heylighen, ende die te ouerwinnen, ende haer is macht gheuen ouer alle gheslachte, ende tonghe, ende nacie.

c Danielis 7.c.21 Apocal. 11.a.7

8

Ende sy sullen haer aenbidden alle die opter Aerden woonen, ^d die hare namen niet gheschreuen en zijn inden boeck des Lams dat gheslacht is vanden beginne der werelt.

d Apocal. 2.a.5 ende 20.b.12 ende 21.c.27 Philip. 4.a.3

9

Ist dat yemant ooren heeft, die hoore.

B.10

Ist dat yemant gheuanghen leyt, die sal in de gheuanckenisse gaen: ist dat ^e yemant met den sweerde doot, die moet metten sweerde ghedoot worden. ^f Hier is de lijdsaemheyt ende het ghelooue der Heylighen.

e Gene. 9.a.6 Matthei 26.f.52

f Apocal. 14.b.12

11

Ende ick sach een ander beeste vander Aerden op komen, ende hadde twee hoornen gelijck het Lam, ende sprack ghelijck de Draeck.

12

Ende sy doet alle de macht der eerster Beesten voor haer, ende sy maect dat de Aerde ende die daer in woonen, de eerste Beeste aenbidden, wiens dootlicke wonde ghenesen was.

13

^g Ende doet groote teeckenen, so dat sy ooc vyer vanden Hemel doet komen op der Aerde voor den menschen.

g 2.Thess. 2.a.9

14

^h Ende verleydtse die opter Aerden woonen, om der teeckenen wille die haer ghegheuen zijn om voor de Beeste te doen, segghende tot de inwoonders der Aerden, dat sy een beelt maken souden der Beesten die de wonde des sweerts hadde, ende weder leefde.

h Deute. 13.a.1 Matthei 24.c.24 Apocal. 16.b.14 ende 19.c.20

15

Ende haer werdt ghegheuen den beelde der Beesten eenen gheest te gheuen, dat oock het beelt der Beesten spreken soude: ende te maken dat alle die het beelt der Beeste niet aen en baden, ghedoot souden worden.

16

Ende maecktse alle, de groote ende kleyne, de rijcke ende arme, de vrije ende dienstbare, dat sy hen een mercteecken geeft op hare rechter hant, of op hare voorhooft.

17

Ende dat niemant en mach koopen noch verkoopen, dan die dat merckteecken heeft, of den naem der Beeste, of het ghetal haers naems.

18

Hier is wijsheyt, wie verstant heeft, die rekene het ghetal der Beeste, want het is eens menschen ghetal, ende zijn ghetal is ses hondert ende ses ende tsestich.