Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xij. Capittel.

1. Uan de beuruchte vrouwe, gewacht vanden Draec, 7. ouerwinninghe teghen hem ghekreghen door Michael, voor de gheloouighe.

A.1

ENde daer is een groot teecken ghesien in den Hemel: Een vrouwe bekleet met der Sonne, ende de Mane onder hare voeten, ende op haer hooft een kroone van twaelf sterren:

12[2]

Ende sy was beurucht, ende riep, hebbende smerte ende quellinghe om te baren.

3

Ende daer is een ander teecken ghesien inden Hemel, ende siet, een grote roode Draec hebbende seuen hoofden, ende thien hoornen, ende op syne hoofden seuen kroonen:

4

Ende synen steert track het derde [deel] der sterren des Hemels, ende wierpse ter Aerden. Ende de Draec stont voor de vrouwe die baren soude, om de vrucht te verslinden als sy soude ghebaert hebben.

5

Ende sy baerde eenen manlicken sone, die alle Heydenen soude ^a hoeden metter ijseren roede: ende haer kint wert wech ghenomen tot God ende synen throon.

a Of, regeren

6

^b Ende de vrouwe vluchtede in de woestijne daer sy plaetse hadde van Gode bereyt, dat syse daer onderhielden, duysent tweehondert ende tsestich daghen.

b Apoc. 12.b.14

7

Ende daer is krijch gheworden inden Hemel, Michael ende syne Engelen krijchden teghen den Draeck: ende de Draeck street ende syne Engelen:

8

Maer sy en hebben niet vermogen, noch haer plaetse en is niet meer inden Hemel gheuonden.

9

^c Ende hy is gheworpen de groote Draeck, de oude slanghe, die ghenaemt wort de Duyuel ende de Satan, die de gheheele werelt verleydt, Hy is [segghe ick] gheworpen op de Aerde, ende syne Enghelen zijn met hem gheworpen.

c Luce 10.b.18 Apocal. 20.a.2

B.10

Ende ick hoorde een groote stemme, seggende, inden Hemel: Nu is de salicheyt ende macht, ende het Koninckrijcke onses Gods geworden, ende de macht zijns ^d Christi, want de verklager on-

d Dat is, Ghesalfden,

[fol. 94r]

ser broederen diese voor God verklaechde, nacht ende dach, die is nu neder gheworpen.

11

Ende sy hebben hem ouerwonnen door het bloet des Lams, ende door het woort haerder getuyghenisse, ende sy hebben haer ^e leuen niet lief ghehadt totter doot.

e Griecx, zielen

12

Hierom verblijdt v ghy Hemelen, ende die daer in woont. Wee den ghenen die opter Aerden ende opter Zee woonen: want de Duyuel is tot v afghekomen, die seer toornich is, dewijle hy weet dat hy kleynen tijt heeft.

13

Ende als de Draeck sach dat hy op de Aerde gheworpen was, heeft hy de Vrouwe veruolcht die een manneken ghebaert hadde.

14

^f Ende der Vrouwen zijn gegeuen twee vleugelen eens grooten arents, om dat sy soude vlieghen van de teghenwoordicheyt des Draecks in de woestijne in haer plaetse, waer sy gheuoedt wert, ^g eenen tijt, ende tijden, ende haluen tijt ^h wt den aensichte der Slanghen.

f Apocal. 12.a.6

g Danielis. 12.a.7

h Griecx, van

15

Ende de Slanghe schoot wt haren monde water als eenen stroom achter de Vrouwe om haer vanden stroom te doen wech stroomen.

16

Ende de Aerde is der Vrouwen te hulpe ghekomen, ende heeft haren mont opghedaen ende heeft den stroom, opghesopen dien de Drack wt synen mont gheworpen hadde.

17

Ende de Draeck was thoornich op de vrouwe, ende is ghegaen om krijch te voeren teghen de andere van haren zade die de geboden Gods hielden, ende het getuygenisse Iesu Christi hadden.

18

Ende ^i† hy stont aen het zant der Zee.

i† anders ick stont etcet