Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. Ioannes is beuolen den Tempel te meten, 3. van de twee ghetuyghen vanden Heere verweckt, 7. ende vermoort van de beeste, 11. ende daerna verwect in eerlickheyt, 15. In het gheluyt der seuenden Enghels is Christus verheuen, ende God ghepresen door de vier ende twintich Ouderlinghen.

A.1

ENde ^a my wert een riet ghegheuen ghelijck een roede, ende de Enghel stont by my, segghende: Staet op, ende meet den Tempel Gods, ende den Altaer, ende die daer in aenbidden:

a Ezech. 44.a.5 ende 41.e.42.43

2

Maer de sale die ^b† buyten den Tempel is, worpt wt, ende en meet dien niet: want hy is den Heydenen ghegheuen, ende de heylighe Stadt sullen sy twee ende veertich maenden betreden.

b† Anders, binnen

3

Ende ick sal [hem] mynen tween ghetuygen gheuen, ende sy sullen Propheteren duysent twee hondert ende tsestich daghen, bekleedt met sacken.

4

^c Dese zijn twee Olijfboomen, ende twee kandelaren die voor den God der Aerden staen:

c Zacha. 4.a.2.5.

5

Ende ist dat hen yemant wil schadighen daer sal vyer wt haren mont gaen, ende hare vyanden verteeren: ende ist dat hen yemant wil schadigen, die moet also ghedoot worden.

6

Dese hebben de macht den Hemel te sluyten, op dat het niet en reghene in de daghen haerder Prophecie: ende hebben macht ouer de wateren die te veranderen tot bloet, ende de Aerde met alle plaghe te slaen, so menichmael sy willen.

7

^d Ende als sy hare ghetuyghenisse sullen voleyndt hebben, sal het Dier dat wt den Afgront koemt krijch teghen hen voeren, ende salse ouerwinnen ende salse dooden.

d Danielis 7.c.21 Apocal. 13.a.7

8

Ende hare lichamen sullen liggen op de straten der grooter Stadt, die gheestelick ghenaemt wort Sodoma, ende Egyptus, daer oock onse Heere ghecruyst is.

9

Ende sy sullen wt de volcken ende gheslachten, ende tongen, ende nacien hare lichamen sien dry daghen ende eenen haluen, ende sullen hare lichamen niet laten in grauen legghen.

B.10

Ende die opter Aerden woonen, sullen blijde ende vrolick wesen ouer hen, ende sullen malcanderen gauen senden, om dat dese twee Propheten de inwoonders der Aerden gequelt hebben.

11

Ende na dry daghen ende eenen haluen is de Gheest des leuens van Gode tot hen ingegaen, ende zijn op hare voeten ghestaen, ende daer is groote vreese gekomen ouer de gene diese sagen.

12

Ende sy hoorden een groote stemme wt den Hemel tot hen segghen: Koemt hier op, ende sy ghinghen op inden Hemel in een wolcke, ende hare vyanden aenschoudense.

13

Ende te dier seluer vre is groote Aertbeuinge gheworden, ende het thiende [deel] der stadt is gheuallen, ende daer zijn in de Aertbeuinge gedoot namen van menschen, seuen duysent, ende de andere zijn verschrickt gheworden, ende hebben den Gode des Hemels eere ghegeuen.

14

Dat tweedde wee is wech ghegaen, het derde wee koemt haestelick

15

Ende de seuende Enghel heeft ghebasuynt, ende daer zijn groote stemmen gheschiet inden Hemel, segghende: De Koninckrijcken der werelt zijn onses Heeren gheworden, ende zijns ^e Christi, ende hy sal regneeren van eewicheydt tot eewicheyt.

e Dat is, Ghesalfdeu,

16

Ende de vier ende twintich Ouderlingen die voor God sitten op hare throonen, zijn op hare aensichten geuallen, ende hebben God aengebeden,

17

Segghende: Wy dancken dy Heere God Almachtich, die Is, ende die Was, ende die Komen sal: dat du dyne groote macht ghenomen hebst, ende regnerest.

18

Ende de Heydenen zijn toornich gheworden, ende dynen toorne is ghekomen, ende de tijdt der dooden dat sy gheoordeelt worden: ende dat du dynen Dienaren den Propheten ende den Heyligen, ende den genen die dynen naem vreesen, den kleynen, ende den grooten loon gheuest: ende dat du de ghene verderfst: die de Aerde verderuen.

19

Ende de Tempel Gods inden Hemel is geopent gheworden, ende de Arcke zijns Verbonts is ghesien gheworden in synen Tempel: ende daer werden blixemen ende stemmen, ende donderslaghen, ende aertbeuinghe, ende groote haghel.